Helland spår stor framtid for Haalands LSK-fetter: – Trur han blir ordentleg god

– Han er ein spelar eg trur blir ordentleg god. Veldig spennande spelar, seier Pål André Helland.

Den tidlegare RBK-spelaren fekk sjølv debuten sin for LSK i eliteserien søndag kveld, og det enda med eit smerteleg 1–3-tap mot Viking.

Men LSKs trøystemål vart altså skåra av ein ung mann med eit kjent slektsnamn, Jonatan Braut Brunes.

– Spennande fysikk

Fire minutt på overtid fekk 20-åringen tak i ballen like utanfor sekstenmeteren, og hamra den rett i mål på kraftfullt vis. Og ja, det heile kunne minne om korleis ein viss annan spiss pleiar å gjere det.

– Den dett ned rett før sekstenmeteren der, så då var det berre å snu seg og få vridd han i hjørnet, beskriv Braut Brunes sjølv.

– Eg er ikkje noko fornøgd med at vi ikkje tok tre poeng, men eg vil jo prøve å få markert meg og bidra til at vi kan få eit mål eller to, legg han til.

Erling Braut Haalands fetter kom til LSK i fjor etter storspel for Florø i 2. divisjon, der han skåra ti mål på 13 kampar. Som fetteren sin er han ein angrepsspelar av den muskuløse og høgreiste typen. Han er 1, 88 høg, seks centimeter lågare enn Haaland. Målet på søndag var hans første i eliteserien, og han hadde berre vore på banen i fire minutt då han skåra.

Helland fortel at han la merke til Braut Brunes med det same han kom til LSK.

– Han er talentfull og har utruleg spennande fysikk. Så har han òg ein bra personlegdom, så eg meiner han kan nå langt. Han har vi mykje glede av her i LSK, rosar trønderen.

Snakkar ofte med Haaland

Konfrontert med rosen frå Helland, svarer Braut Brunes i same stil som fetteren sin: Ganske kort.

– Det er kjekt at han tykkjer det, seier han og smiler.

Han smiler òg då han får spørsmål om han kanskje allereie er i ferd med å bli litt lei av å bli mint på at han har ein kjend fetter.

– He-he. Nei da. Eg konser ikkje så mykje på det, seier han.

– Snakkar de mykje saman?

– Ja, veldig, vi snakkar mykje saman, men mest om ting utanom fotball.

– Så ikkje så mykje om korleis skåre mål og slikt?

– He-he, nei, ikkje så mykje sånt, seier han, før han ruslar vidare i pressesona.

Braut Brunes har signert ein avtale med LSK som strekkjer seg til 2023. Han har Braut Haalands far, Alf Inge Haaland, som agent, akkurat slik som Dortmund-stjerna sjølv har.

Mot Viking kom Braut Brunes inn som innbytar. Han konkurrerer om speletida med ein erfaren og tiltrudd spiss i Thomas Lehne Olsen.

LSK har elles fått ein trå start på eliteserien, med to strake tap mot Strømsgodset og Viking, begge med resultatet 1–3.

• PS! Erling Braut Haaland har nok ein fetter i ein eliteserieklubb. 17 år gamle Albert Braut Tjåland er for tida i Molde, og speler ungdomsfotball der. Også han speler spiss.