Kristine Lunde Borgersen er kanskje den største profilen på Vipers Kristiansand, og ein av få lokale spelarar.
Foto: Sander Heggheim/NRK– Å byggje eit lag av sørlendingar trur eg er naivt å tru, seier Gunnar Pettersen til NRK.
Heile sju av spelarane i Vipers-troppen har utanlandsk pass.
– For meg spelar det inga rolle om spelarane kjem frå Holland, Island, Danmark eller ein stad i Norge. Eg tippar du skal ha fram at dei burde ha vore herifrå. Den tid er forbi, seier trenaren.
– I gamle dagar kunne vi byggje eit lagt frå botnen i Stavanger, Porsgrunn eller Skien. Det går ikkje lenger. Du må ha tilvekst utanfrå, seier han.
Fire lokale
Den tidlegare landslagstrenaren viser mellom anna til fotballen, der det var 110 utlendingar i eliteserien førre sesong.
– Larvik som er topplag i både Norge og Europa har vel knapt ein spelar frå Larvik. Knapt nokon frå Vestfold. Det er viktig å stimulere handballen i distriktet. Der tykkjer eg Vipers har starta bra. Vi reiser rundt og har treningar i ulike hallar og klubbar, slik at flest mogleg som vil satse endar i Vipers, seier han.
Denne sesongen har klubben fire lokale spelarar som kan vere med å setje sitt preg på laget.
Vilde Jonassen (22) frå Kristiansand, Siri Aaserud (23) frå Arendal, Tonje Haugjord Refsnes (19) frå Evje og ikkje minst Kristine Lunde-Borgersen frå Kristiansand.
Sjå intervju med Vipers-trenar Gunnar Pettersen.
– Vi har einaren
– Vi har Tonje som er frå regionen, som eg trur kan bli ei overrasking. Det er inga ulempe. Vi må ha nokre innslag. Vi har jo ein av dei mestvinnande spelarane i verda i Kristine Lunde-Borgersen. Vi har einaren, seier Vipers-trenaren.
– Er det mogleg å skape den same entusiasmen i lokalbefolkninga med mange utanlandske spelarar?
– Eg trur folk er opptekne av om laget vinn eller ikkje. Vinn du trur eg entusiasmen vil vere der i fullt monn. Går det dårleg vert det mykje vanskelegare, seier Pettersen.
Språkutfordring
I spelarstallen er Nederland, Sveits og Island representert. Pettersen vedgår at det har ført til utfordringar.
– Det er litt stressande. Eg kan ikkje ta alt på norsk. Eg har berre skuleengelsk, og kan ein del faguttrykk på tysk, men det er berre ein spelar eg når fram til med tysk. Resten må eg ta på engelsk, seier han.
– Det har gjort det litt meir utfordrande å få detaljane i systemet og filosofien fram, men det har gått betre enn venta. Eg tykkjer vi har kome lenger enn eg trudde for eit par månader sidan, legg Pettersen til.
Då Vipers tok bronse i serien i 2003 var det stort sett berre lokale spelarar i troppen. Laget tok seg også til semifinalen der det vart tap mot ungarske Györ.
