Reiten har vorte ein nøkkelspelar for både Chelsea og Noreg dei siste sesongane. Torsdag er ho sjølvskriven når landslagssjef Martin Sjögren set opp 11-eren mot Nord-Irland.
For fem år sidan vart Reiten vraka til dei to første kampane i gruppespelet. Ho starta i den siste kampen mot vertsnasjonen Nederland, som sende Noreg heim med null poeng og null mål.
Nedbrotne norske spelarar vart sitjande igjen på grasteppet. Den då 22 år gamle Reiten skulle snart skrive ned alt ho hadde lært frå meisterskapen.
Det var eit veldig personleg brev, understrekar Reiten. Det er berre Reiten sjølv og idrettspsykolog Anne Marte Pensgaard som har lese det.
– Eg fekk beskjed om å skrive eit brev til meg sjølv etter meisterskapen med alt eg lærte. Alt eg ville sagt til meg sjølv etter meisterskapen med det eg lærte, og kva eg ville sagt til meg sjølv før det starta slik at eg visste kva eg skulle gjere neste gong.
– Det brevet har eg på PC-en og eg har tenkt å lese gjennom det i morgon (onsdag). Ein lærer alltid, veit du, seier Reiten til NRK.
Trur ho var meir redd
Reiten las det same brevet også før VM i 2019. Då vart ho minna på at ho «i alle fall skal kose meg no».
– Om det var det som hjelpte, eller om eg har vorte eit par år eldre og fått endå litt meir erfaring på eit høgare nivå, er eg litt usikker på. Men vi kan seie at det hjelpte litt, kvar prosent tel, seier 27-åringen.
Reiten vil ikkje gå i detalj på kva som står i brevet, men litt kan ho fortelje.
– Det går jo på den kjensla eg hadde inn i den meisterskapen. Eg var kanskje litt meir redd for kva som kan skje kontra å heller sjå det positive og prøve å nyte augneblinken. Det er noko ein aldri får tilbake, så ein har liksom lyst å få ut potensialet sitt der og då, seier Reiten.
– Beste erfaringa
2017-EM var den første meisterskapen for Martin Sjögren. Svensken kom frå suksessrike sesongar i Linköpings FC, der han vann seriegull i 2016.
Så vart det altså bråstopp i hans første eksamen for Noreg.
– Det var ei sterk oppleving på fleire ulike måtar. Sjølvsagt var det ein skuffelse resultat- og prestasjonsmessig. Så var det masse som skjedde i ettertid. Av erfaring er det den beste erfaringa eg har hatt som leiar og trenar i karrieren min – der eg har lært mest, seier Sjögren, og trekkjer fram handteringa av motgang.
Reiten har erfaringa lagra i eit Word-dokument på PC-en. Onsdag set ho seg ned og minner seg sjølv på korleis ho skal angripe meisterskapen.
– Det skal eg kose meg med, seier Reiten og smiler.