Grafen som viser skijentenes enorme utvikling

Grafikken over viser kor langt bak beste norske løpar var bak vinnaren i dei åra Norge ikkje har vunne Tour de Ski og kor lang bak beste utlending har vore bak vinnaren i åra vi har vunne.

– Det er ein kombinasjon av to faktorar. Den første er at det norske damelaget er betre enn nokon gong, og breidda i internasjonal langrenn var større då Tour de Ski vart oppretta, seier NRKs langrennskommentator, Torgeir Bjørn.

I årets Tour var Charlotte Kalla beste ikkje-norske utøvar med sin fjerdeplass, heile sju minutt og 45 sekund bak Therese Johaug.

Gjennom heile Touren har det blitt snakka om den norske dominansen, og differansane frå dei norske vinnarane og ned til beste utlending var rekordstor.

Store differansar

Som grafikken over viser faktaboksen at det berre var fire løparar på kvinnesida som var innanfor sju minutt og 45 sekund bak Johaug. Aldri før har det vore så store avstandar i samandraget i Tour de ski.

– Tour de Ski har jo endra litt på distansane og reglane for bonussekund opp gjennom åra, men avstanden er representativ for kor suveren Johaug har vore på distanserenn denne sesongen, seier Bjørn.

Også på herresida var det store differansar frå vinnar Martin Johnsrud Sundby ned til beste utlending, som kom i mål nesten fire minutt bak.

Superstjernene som forsvann

Men det er lett å gløyme at historisk sett har Norge slite med å gå til topps i Touren.

I år hadde Tour de Ski 10-års jubileum. Det har tatt dei norske utøvarane åtte forsøk og mange andreplassar i jakta på samanlagtsigeren, før Johaug og Sundby vann i 2014. Utøvarar frå Tyskland, Polen, Sveits, Tsjekkia, Russland, Finland og Sverige kunne jubla for samanlagtsiger, før Norge fekk sin første.

– I kvinnelangrenn er det mange superstjerner som anten har lagt opp eller vore ein skugge av seg sjølv. Justyna Kowalczyk og Charlotte Kalla er ikkje på same nivå som før, medan Virpi Kuitunen har lagt opp, seier Bjørn.

Beste norske aldri har vore like langt bak vinnaren som det Kalla og Ustiugov var i år, men dei har dårlegare samanlagtplassering.

I 2008 var det ingen norske på pallen. Best av dei norske var Tord Asle Gjerdalen på fjerdeplass, nesten tre minutt bak vinnar Lukáš Bauer. På kvinnesida vart Kristin Størmer Steira beste norske på ein 11.-plass.

Frå 2008-2010 hadde Norge tre år på rad utan ein einaste pallplassering på kvinnesida.

– Dei norske løparane tok nok ikkje Touren på alvor i starten og brukte lengre tid på å knekke Tour-koden enn dei utanlandske løparane, seier NRKs langrennsekspert, Fredrik Aukland.