Mindre videodømming i golfsporten

Golfsporten går motsett veg av fotballen og avgrensar videodømming. Iallfall etter tips frå publikum.

Lexi Thompson

KNUST: Lexi Thompson i tårer inn mot eitt av dei siste hola i turneringa 2. april i år. Ho har nettopp fått vite at ho - etter tips frå tv-publikum - får fire tilleggsslag som straff for å ha plassert ballen eit par centimeter feil dagen før. Dermed blir den store leiinga borte

Foto: ROBERT LABERGE / AFP

Heretter skal ingen kunne tipse arrangøren og vise til tv-opptak for å straffe golfspelarar for mindre regelbrot. Feilen som ikkje blir oppfatta av det menneskelege auge direkte, skal ikkje straffast.

Royal & Ancient i Skottland og USAs golfforbund – som er dei som fastset reglane i internasjonal golf – vedtok dette i går, og regelen skal gjelde frå i dag.

Hendinga som fekk fart i forslaget om å sjå bort frå videobevis, var Lexi Thompson-episoden tidlegare denne månaden.

Fire tilleggsslag dagen etter

Thompson tok opp ballen for å merke han, og bomma med eit par centimeter då ho skulle legge ballen tilbake. Dette såg ikkje dommarane.

Men ein tv-sjåar hadde lagt merke til det og tipsa arrangøren før runden neste dag. Dei studerte videoen og gav Thompson fire tilleggsslag – to for å ha flytta ballen og to for å ha signert eit ukorrekt scoringskort.

Halvveges i den siste runden fekk ho vite om straffa. Og det var ei gråtande Lexi Thompson som avslutta runden. Det heldt til delt førsteplass likevel, men ho tapte omspelet.

– Eg var ikkje klar over at eg gjorde det, sa Thompson etterpå.

Anna Nordqvist

STRAFFA: Anna Nordqvist var på veg mot ein overraskande siger i US Open i fjor. Men to tilleggslag etter publikumstips om regelbrot øydela for den svenske jenta

Foto: JEFF GROSS / Afp

Med dei nye reglane hadde ikkje svenske Anna Nordqvist fått ei straff på to tilleggsslag i US Open i fjor. Dei to slaga kosta henne sjansen til ein sensasjonell siger.

Har gått for langt

Super-slowar i tv-sendingar avslører stadig små feil for publikum. Så mange at det no har gått for langt, meiner dei som styrer golfen.

Golf-leiarane har diskutert dette i fleire år, i samband med ei meir omfattande modernisering av reglane. Dette skulle eigentleg teke til å gjelde frå 2019.

Thompson-hendinga førte til stort oppstyr i media, og fleire spørsmål melde seg:

Skal arrangøren ta omsyn til tips frå tv-publikum? Kor lang tid kan det gå mellom eit mindre regelbrot og straffa? Er tips frå publikum urettferdige overfor dei beste, dei som oftast er på tv-skjermen?

Det var dette som førte til at regelen no skal få effekt straks, ikkje om to år.

– Golf har høg integritet

Videodømming etter tilfeldige tips frå publikum går på golfens integritet laus, meiner regelkomiteen.

– Golf har alltid vore ein sport med høg integritet. Derfor vil vi legge meir vekt på spelarens eigen vurdering enn på det videoteknologien viser, seier R&A-direktør Martin Slumbers.

– Avgjerder må bli tekne raskt. Då er dei ikkje alltid heilt presise, men det er viktig at kravet til presisjon ikkje er så detaljert at spelarane må gå å vere usikre på videobasert dømming i etterkant, seier Slumbers.

Siste nytt

  • Messi ut med armskade

    Lionel Messi landet forkjært og hadde store smerter i den ene armen. Han prøvde å spille videre med bandasjert arm, men klarte ikke å fortsette toppkampen mot Sevilla.

    Det er ikke klart hvor alvorlig det er. Om bare en uke skal Barcelona møte Real Madrid til sesongens første El Clasico.

    Messi løp inn i ryggen på en motspiller og gikk i bakken uten å få tatt seg skikkelig for.

    Lionel Messi
    Foto: Manu Fernandez / AP
  • Norge ikkje til curling-finale

    Det norske laget blei slått 7-3 av heimelaget Canada i semifinalen i miks-VM i curling. Det stod 3-3 etter fem omgangar, men Canada vann både omgang 6 og 7 med 2-0, og Norge valde å gi opp.

    I natt skal Ingvild Skagas mannskap spele mot Russland om bronsen. Canada møter Spania i finalen.

Sendeplan

Kl. Program Kanal