Søndag kveld plasserte toppidrettsjef Tore Øvrebø mykje av skulda for Norges dårlegaste medaljefangst i OL på 32 år på fleire av særforbunda.
– Det er ein del særforbund som kunne ha gjort meir på eiga hand for å kome opp på eit nivå der det blir interessant for oss å samarbeide med dei, sa Øvrebø, utan å ville seie kven han sikta til.
Evalueringsrapporten etter London-OL i 2012 tilrådde at målsetjingane skulle gå meir i retning resultat, ikkje først og fremst utvikling.
Men slik har det ikkje gått.
Norge tok fire bronsemedaljar i OL i Rio. For første gong sidan Tokyo-OL i 1964 greidde dermed Norge verken gull eller sølv i eit OL. Det beklagar Øvrebø. Samstundes kom han med eit spark til fleire av idrettsforbunda.
– Vi har jobba veldig tett på dei miljøa som har teke medaljar. Så kan de slutte ting ut frå det, sa Øvrebø til det norske pressekorpset i Rio søndag kveld.
Ingen tar kritikken inn over seg
Men ingen av dei medaljelause særforbunda NRK har snakka med, vil ta til seg kritikken. Dei rosar tvert imot samarbeidet med Olympiatoppen.
– Vi har hatt eit kjempegodt samarbeid med Olympiatoppen, seier sportssjef Morten Ivarsen i Norges Padleforbund. Ingen norske padlarar kvalifiserte sge til OL.
Skyttarane var representert i Rio, men åttandeplassen i heilmatch for menn var einaste finaleplassen. Men heller ikkje Norges Skytterforbund vil skulde på Olympiatoppen.
– Vi kjenner oss slett ikkje råka. Eg er ikkje på nokon måte kritisk til Olympiatoppen, eg veit at vi samarbeider godt. Det har vi gjort i mange år, seier sportssjef Tor Idar Aune.
Dei norske seglarane var heller aldri i medaljekampen i Rio.
– Det er sikkert mykje vi kunne gjort betre, seier generalsekretær Espen Guttormsen. – Men vårt samarbeid med Olympiatoppen er godt. Vi har fått god støtte og hjelp når vi har hatt behov for det, seier Guttormsen.
Tiårsplan etter London-OL
Idrettspresident Tom Tvedt måtte også svare for dei magre resultata i Rio.
– Det er kritikk fra mange hald om at dette ikkje er eit OL som held mål for Norge?
– Det er viktig å evaluere og sjå bak resultata. Etter London-OL la vi ein 10-årsplan for norsk idrett, og den står vi 100 prosent bak. Vi skal stå på den strategien vi har valt, seier Tvedt til NTB.
– Då du leia utvalet som la fram sin rapport i 2012, sa du at de skulle vere «brutalt ærlege». Blir dette også inngangen til den komande evalueringa?
– Svaret på det er ja. I toppidrett og livet generelt så må du vere ærleg og sjå på kva som fungerer og ikkje fungerer. Det må vere kunnskapsbasert. Om ikkje, lurer vi oss sjølv, meiner Tvedt.