Froome vann både Tour de France og Vuelta a Espana i år. Det var 7. september, etter tredje etappe av Vueltaen, at han avgav den positive prøva. Både A- og B-prøva var positive, stadfester det internasjonale sykkelforbundet (UCI). Resultatet blei kjent for Froome sjølv, hans lag og UCI to veker seinare.
– Det er velkjent at eg har astma, og eg kjenner godt til reglane. Eg inhalerer medisinen for å handtere sjukdomen, men passar alltid på å halde meg innanfor reglane, fordi eg veit eg blir testa, seier Froome i ei pressemelding.
– Astmaen blei verre under Vueltaen, så eg følgde legens råd om å auke dosen, legg han til.
2000 nanogram
Både advokatar og analyseekspertar jobbar hardt for Froome for å verifisere prøveresultatet, og det er derfor det har tatt så lang tid før resultatet er offentleg, skriv avisa.
LIT PÅ FROOME: Sky-leiar Dave Brailsford har tillit til at Froome følgde råda han hadde fått
Foto: Christophe Ena / APFroomes lag Team Sky skriv i ei pressemelding at Froome sidan barndomen har vore plaga av astma, og at han har brukt medisin lenge. Dei stadfestar at han hadde 2000 nanogram i prøven i september.
– Han fekk akutte astmasymptom under Vueltaen. Etter råd frå vår lege auka han dosen, men innanfor dei tillatne mengdene.
– Froome blei testa i alt 21 gonger. 20 av gongane viste prøvene salbutamol-innhald innafor lovlege verdiar.
Team Sky-sjefen stoler på Froome.
– Eg har full tilit til at Froome følgde dei medisinske retningslinjene for å takle sine astmaproblem, seier Sky-sjef Dave Brailsford.
– Klønete
- RIPE I LAKKEN: Kommentator Ole Kristian Stoltenberg er overraska over at ikkje Sky-laget handterte Froome-medisineringa betre
Foto: Elin Fossum / NRKNRKs sykkelkommentator Ole Kristian Stoltenberg er overraska.
– Dette er astmamedisn der han har gått litt for hardt på dosene. Det er brot på dopingreglementet, og det overraskar meg. Team Sky er største sykkellaget i verda med budsjett, legar og trenarar i mengder. At dei ikkje greier å halde orden på det, er klønete.
Han trur ikkje den positive prøva er avgjerande for Froomes karriere.
– Det er ikkje anna enn ein litt for stor dose astmamedisin som i utgangspunktet er lovleg. Men det er ei solid ripe i lakken for Froome.
Stoltenberg trur det går mot ei utestenging.
– Kanskje nokre månader, slik som med Martin Johnsrud Sundby. Det kan bety nokre ritt på vårparten, men han er nok raskt tilbake.
Samme virkestoff som Sundby
Salbutamol er verkestoffet som finst i astmamedinen Ventolin.
Dopingreglementet tillèt opptil 1000 nanogram per milliliter urin. Men Froome skal ha hatt dobbelt så store mengder i sin prøve.
Stoffet er det same som felte Martin Johnsrud Sundby. Hans prøver i sesongen 2014/15 blei målt til 1340 og 1360 nanogram per milliliter urin. Han blei dømd fordi skiforbundet ikkje søkte om fritak frå grensa på 1000 nanogram.
Dersom prøveresultatet står seg, kan Froome miste sigeren i Vuelta a a Espana. Han kan også miste bronsen han tok i temporittet i VM i Bergen.
Froome kan også bli utestengd frå mellom anna Giro d'Italia og Tour de France neste år, to ritt han har sagt han vil prøve å vinne. Han har vunne Tour de France fire gonger, seinast i sommar.
