Han er den største stjerna og den største favoritten under VM i Holmenkollen. Men nå kan Martin Fourcade stille svakare enn venta til VM-starten på torsdag.
– Martin fekk ein infeksjon etter at han kom heim frå USA og mista fem dagar med trening. Me var redde da han fekk feber, fortel den franske landslagstrenaren Stéphane Bouthiaux.
TILBAKE I TRENING: Martin Fourcade hadde i dag sin fyrste dag saman med lagkompisane i VM-løypene etter oppkøyring på Geilo.
Foto: Anders Rove Bentsen / NRK– Håpar eg har tatt igjen i treninga
I dag var Fourcade på plass i Holmenkollen etter å vore på treningssamling på Geilo og trena som normalt dei siste seks dagane. Men før det var den siste delen av VM-oppkøyringa langt frå problemfri for verdscupleiaren.
– Eg var sjuk etter USA-turen, men nå er alt bra. Eg håpar eg har tatt igjen treninga eg tapte, seier Fourcade til NRK etter treningsøkta i VM-anlegget.
Trenar Bouthiaux fortel at 27-åringen sleit med tette luftvegar og feber, og låg heilt utslått i tre-fire dagar. Dermed var han naturleg nok sett ein del tilbake da han var tilbake i skiløypa på Geilo sist veke.
– Formen var ikkje god i starten av førre veke, men han hadde ei hardøkt på laurdag og gjekk testrenn i går. Da verka alt mykje betre, sjølv om han ikkje hadde formen frå verdscuprunden i USA heilt inne, fortel Bouthiaux.
– Feber er krise
NRKs skiskyttarekspert Ola Lunde meiner det er langt frå gunstig å dra med seg sjukdom inn i dei siste førebuingane til meisterskapet.
– Feber er veldig krise med tanke på VM. Det kan skape problemer for Fourcade, særleg i starten av meisterskapet. Det set kroppen veldig tilbake og ikkje minst skapar det usikkerheit, seier Lunde
Fourcade sjølv verkar å sjå lyst på meisterskapet som opnar med mixed-stafett torsdag.
– Ein veit aldri, men eg håpar å vere i god form til helga og mixed-stafetten vil vere ein fantastisk oppvarming for meg.
SKAL GÅ TORSDAG: Martin Fourcade har aldri vore med på å ta gull på mixed-stafett og er topp motivert for å starte VM med mixed-stafett på torsdag.
Foto: Anders Rove Bentsen / NRKIfølgje landslagstrenaren har det aldri vore snakk om å stå over konkurransar.
– Han vil stille i alle konkurransane her og skal gå på torsdag. Han vil vinne det han ikkje har vunne, og vil bruke mixed-stafetten som ein god gjennomkøyring.
Martin Fourcade har berre sølv og bronse frå mixed-stafett i VM. På torsdag er han klar for å prøve igjen.
