I sju år har Sogndal venta på å få spele på øvste nivå. Søndag var dei tilbake i Eliteseriserien utan å imponere.

For laget frå Sogn og Fjordane gjekk spelet fort, og gjestene hadde nok med å forsvare seg i første runde mot Strømsgodset i Drammen.

– Dette er eit tempo vi ikkje er vand med. Kunstgraset gjør at ballen går fortare, seier Sogndals trenar Harald Aabrekk.

(artikkelen held fram under biletet)

Kamara: – Deilig å åpne kontoen

Ola Kamara sende heimelaget i føringa etter 32 minutt på heading etter innlegg frå Lars Christopher Vilsvik.

– Det var deilig å åpne scoringskontoen og fortsette den gode trenden frå i vinter, seier Kamara.

No ser han fram mot neste kamp mot Start om to veker. Kamara scora nemleg i begge oppgjer mot sørlandslaget i fjor.

Måtte ha straffe for å score

Heimelaget si scoring nummer to kom like etter pause då Fredrik Lund Nordkvelle heada ballen kontant i mål i duell med Sogndal-spelar Even Hovland.

Dei kvitkledde gjestene vann førstedivisjon suverent i fjor. Då scora laget 51 mål på 28 kampar.

I dag måtte det straffe til for at Sogndal skulle score. Ole Jørgen Halvorsen sette ballen i mål frå 11-metersmerket i det 89. minutt.

Sogndal-sluttspurt

Etter reduseringa sette bortelaget inn ein sluttspurt, men det var ikkje nok til å ta sigeren frå heimelaget.

– Strømsgodset vann fortent, men det var litt surt å tape når vi hadde ein så god sluttspurt, seier trenar Aabrekk.

Han trur Sogndal kan gjere det betre så fort dei blir vand med kunstgraset på norske eliteseriebanar.

– Men hadde dette vore naturgras er prestasjonane i dag langt unna vårt beste, fortel trenaren.