Det er ikkje sølv som glitrar i augene til Hødd-supporterane. Det er glitrar av vona om gull, og at stoltheit fordi laget har kome så langt som til cupfinalen.

– Hødd har vore med på mykje i norsk fotball, men dette er nok den største enkelthendinga nokon gong, seier Hødd-legenda Kjetil Hasund til NRK. At vi står her i dag, i Oslo, to dagar før Hødd skal spele cupfinale ... det er ein draum som har gått i oppfylling. Vi har drøymt om dette, men eg hadde nok rista på hovudet om nokon i januar sa til meg at vi skulle til Ullevål i november, seier den tidlegare storspelaren på Hødd.

• Høyr cupsending på radio laurdag 13.30-15.30

Alt fredag opna Hødd-leiren på Youngstorget i Oslo. Her er store telt for konsertar, mindre kafételt, endå mindre boder, ja ei heil sunnmørsk gate er bygt opp midt i Oslo.

– Dette er så fantastisk at vi knapt har adjektiv igjen, seier ordførar i heimkommunen til Hødd, Jan Berseth. Folk er tent, dette er stort. Og dette er berre oppladinga til det store som skal skje søndag, seier han og ser alle dei blåkledde kome strøymande til.

• Les også: Slik blir Hødd-festen i Oslo

– Byggjer fellesskap

Ein av grunnane til at han er både stolt og rørt, er bølgja av samhald og identitet som har skylla over Ulstein i samband med at Hødd har kvalifisert seg til cupfinalen.

– Dette byggjer fellesskap. Heile samfunnet vårt får ei felles oppleving. Og dette er merkevarebygging i stor skala. Hugs at Hødd er merkevara vår, saman med dei store næringslivsaktørane Ulstein Group, Kleven og Rolls-Royce, seier den stolte ordføraren.

– Det blir rørande

Hødd sin supporterklubb, «Blåsarane», er sjølvsagt på plass. Dei har førebudd seg godt, med songar, supporterutstyr og med ei kraftig markering inne på tribunane i samband med kampen.

– Dette blir stort. Eg kjenner alt at dette blir rørande. Stemninga er i ferd med å byggje seg opp, seier leiar for Blåsarane, Guttorm Remøy Vartdal.

– Du fryktar ikkje at de tek ut alt for mykje, no tidleg i helga då?

– Nei, no skal stemninga få byggje seg opp. Dette er eit forspel. Og det skal bli stor fest på søndag. Og vi skal ikkje gå i Brann-fella: Vi skal møte opp tidleg på søndag, seier leiaren for Hødd-supporterane.

– Det er allereie ein siger

Kjetil Hasund har meg seg både den ærerike historia til Hødd og kunnskapen om dagens Hødd-stall, når han analyserer det som kan kome til å skje denne helga.

– Hødd har vore eit førebilete for mange klubbar. Vi viste at klubbar frå små stader kunne få til noko. Og for eit lag som Hødd er det på ein måte ein siger berre å kome hit til cupfinalen. Men held Hødd toppnivået skal Tromsø få slite, seier Hasund.

– Ein klar filosofi

Spelarane på Hødd har imponert mange denne sesongen, sjølv om laget har slite i serien. Hasund seier Hødd er eit godt lag, med mange spennande spelartypar.

– Det er eit spelande lag, og eit lag med ein klar fotballfilosofi. Og på sitt beste er Hødd også eit svært effektivt lag, seier han før han må gå og helse. Rundt seg ser han slekt og kjenningar. Det kan verke som heile Ulstein har flytta til Youngstorget i kveld.