Normal

Liverpool kan vere til sals igjen

Liverpools eigarar skal vere villige til å vurdere sal av klubben, fordi dei ikkje skal ha fått nok igjen for investeringane sine. Eigarane sjølve avviser likevel rykta.

Gerrard scorer i Australia

Her er det Liverpool-jubel i Australia. Men hos klubbeigarane skal det ikkje vere mykje jubel, ifølgje The Sun, som meiner å vite at eigarane vil kvitte seg med Liverpool

Foto: MAL FAIRCLOUGH / Afp

Det er avisa The Sun som skriv dette i dag. Dei meiner å vite at amerikanske Fenway Group kom til denne konklusjonen etter at Liverpool i mai ikkje greidde å kome til kvalifiseringa for meisterligaen i år heller.

Klubben har brukt 1,7 milliardar kroner på spelarkjøp sidan Fenway overtok, men utan å klare å kjempe i toppen av Premier League.

Men ein talsperson for Liverpool avviser dette på vegner av eigarane. – Fenway Sports Group gjer det heilt klart at Liverpool FC ikkje er til sals. Det er inga sanning i denne historia, seier talspersonen.

– Vi har ikkje snakka med nokon om sal, og vi anar ikkje kva desse rykta kjem frå, seier Fenway i ei anna pressemelding.

The Sun skriv likevel at det saudiarabiske oljeselskapet Saudi Aramco har lagt inn uformelt bod på klubben, og at to amerikanske milliardærar også skal vere mogelege kjøparar – dette ifølgje kjelder i Londons bankmiljø. Klubben skal uoffisielt ha ein marknadspris på 350 millionar pund, eller opp mot 3,2 milliardar kroner.

– At det er aktuelt å selje Luis Suarez no, er ikkje tilfeldig. Sal av ein stjernespelar er eit klassisk signal for å ønskje seg ut, seier bank-kjelda som The Sun siterer.

Fenway Sports Group kjøpte Liverpool for 300 millionar pund (2,7 milliardar kroner) hausten 2010.

Fotballnyheter