Kaos pregar igjen omgjevnadene rundt Sportsklubben Brann. Torsdag kom meldinga om at klubben fornyar kontrakten med trenar Rune Skarsfjord. Fredag møtte Brann-supporterane opp på stadion for å visa avsky mot leiinga i klubben.

Banner som «Brann: Kjøpt og betalt» og tilrop om at «styret må gå» overskyggja det sportslege i poengdelinga mellom Brann og Lillestrøm.

Slår tilbake mot supporterane

Etter kampslutt gjorde dagleg leiar Roald Bruun-Hanssen det som er sjeldan i fotballen. Han slo tilbake mot demonstrasjonen frå supporterane.

– Utover i førsteomgangen synst eg det vart uansvarleg oppførsel frå dei.; Tilrop toler me, men dei må finna balansen og støtta laget. Der synst eg ikkje dei trefte i det heile tatt, seier den øvste administrative leiaren i klubben.

Er det ikkje dristig å kritisera supporterane på ein dag som denne?

– Supporterane må òg tola at hovudmålet til alle må vera at dei skal støtta laget. Eg synst dei drog det alt for langt i dag, seier Bruun-Hanssen til NRK.no.

Usikre på Skarsfjord

Det er tidspunktet for den nye treårsavtalen som provoserer mange av supporterane. Den førre kontrakten med trenaren varte fram til sesongslutt 2014. Brann har etter tapet mot Lillestrøm gått fem kampar utan tre poeng, klubben har ikkje vunne ein bortekamp på snart eit år og mange er kritiske til om Rune Skarsfjord er rett mann til å leia klubben vidare.

I tillegg krev dei fakta på bordet om korleis ei pengegåve frå forretningsmannen og velgjeraren Trond Mohn verka inn på kontraktsprosessen. Klubben nektar for at pengegåva på 10 millionar frå Mohn kan sjåast på som press for å få på plass ein ny avtale med Skarsfjord.

LES ÒG: Pengar skal ikkje styra klubben

Støttar protestane

Leiar i supporterklubben Bataljonen, Roger Lillebøe-Hansen seier at han stiller seg bak protestane frå store delar av den harde kjernen på Brann stadion.

– Eg synst kritikken er ganske sakleg, i alle fall sett ut ifrå at det kjem frå ein tabloid fotballtribune. Eg har snakka med fleire i Brann, blant andre Rune Skarsfjord, og forstår at dei ikkje var einige i det, seier Lillebøe-Hansen.

Han er usikker på om han har tillit til leiinga i klubben, og krev fakta på bordet.

– Me har stilt ein del kritiske spørsmål om tidspunktet fordi me er usikre på om det er rett å forlenga med Skarsfjord. I tillegg krev me svar på prosessen rundt dette litt uklare bidraga frå Trond Mohn. Me har ikkje fått alle svara, og dette må me botn i.

Stiller du deg bak tilropa om at styret i Brann bør gå av?

– Det har eg ikkje tatt stilling til. Eg meiner dette må diskuterast på eit årsmøte.

Vil de ta initiativ til eit ekstraordinært årsmøte?

– Det er noko me no diskuterer.

Fredag kveld sat styret i supporterklubben samla til møte. Seinare på kvelden venta møte med den daglege leiaren i sportsklubben.

Ordknapp hovudperson

Brann-trenar Rune Skarsfjord vert svært kort i svara når NRK.no spør han om korleis han opplever protestane etter at han vart einig med klubben om ein ny kontrakt.

– Eg har ein jobb å gjera, så får andre i klubben svara på korleis dei opplever det.

Men går tilropa inn på deg?

– Eg har hundre prosent fokus på jobben min.

– Gjekk ut over prestasjonen

Også fleire spelarar er skuffa over tilropa frå tribunen. Amin Askar opplevde det som at laget fekk supporterane i mot seg.

– Eg skulle ønskja at dei ikkje dreiv med dette på kampdagen. Dei kan komma å møta oss på trening. I dag får me dei mot oss, noko som pregar oss på ein negativ måte.; Dette vert for dumt, seier østfoldingen.

Det vert som regel tatt ille opp når klubbar og spelarar vender seg imot supporterane, men Roger Lillebø-Hansen vel å vera diplomatisk når han får høyra om kritikken frå Bruun-Hanssen og Askar.

– Når me kritiserer dei må me vel tola at dei kritiserer oss. Men me krev at dei svarar skikkeleg på kritikken vår, seier supporterleiaren.