20.000 pund spytta han inn i Scarborough Athletic før sesongen i fjor. Denne veka har han gått inn med 10.000 til.
Med dagens kurs nærmar det seg 400.000 kroner i løpet av eit års tid.
– Kanskje kan det hjelpe oss til å lønne eit par spelarar til, seier han.
– Men det er på vilkår av at lokale krefter går inn med like mykje. Den lokale tilknytinga er viktig, og alle må hjelpe til så godt dei kan, seier Guttelvik til NRK.
Supporterstyrt klubb
Scarborough Athletic spelar i Northern Premier League Division One North. Det er åttande nivå i ligapyramiden. Klubben er fullstendig supporterstyrt, og Are Guttelvik er ein av dei fremste supporterane.
I vår kåra Supporterunionen for engelsk fotball Are Guttelvik til årets supporter for førre sesong.
I engelske media denne veka stod det at pengane han set inn, skal hjelpe klubben med ny bane. Det er berre indirekte rett.
– Det pengane først og fremst skal gå til, er lønningar og anna sportsleg satsing. Dei utgiftene er ikkje så store på dette nivået. Bana som skal byggjast, er kommunal, men vi må vise at det er mykje som skjer i og rundt klubben, og at kommunen gjer rett i å hjelpe oss til å kome heim. Investeringane er derfor viktig for framdrifta, seier Guttelvik.
Tre mil til heimebana
Sidan klubben vart stifta i 2007 har Scarborough Athletic spela heimekampane i Bridlington, rundt tre mil unna. No er kommunen i gang med å byggje ny bane i byen. Den skal etter planen ha rundt 2000 plassar og stå ferdig på nyåret i 2017.
Det er ein dag Guttelvik ser fram til.
– Eg håpar at det vil skaffe oss fleire supporterar. Vi har ambisjonar om å kome oss oppover i ligasystemet, men vi må skunde oss langsamt, seier han.
– Om vi greier å få 30-40 fleire tilskodarar regelmessig på kampane, vil det gjere in stor skilnad for klubben, seier han til scarboroughathletics.com.
Klubben hadde 1118 tilskodarar i snitt på kampane sine i Bridlington sist sesong – det er det klart meste dei har hatt.
– Uvurderleg
Styreleiaren i klubben, Dave Holland, er svært glad og takksam for Guttelviks bidrag.
– Det er uvurderleg for klubben når vi går inn i den forhåpentleg siste sesongen i Bridlington. Are ser kor viktig det er med gode kontakter inn mot kommunen. Klubben ser at ei flytting tilbake til Scarborough kjem nærmare når vi har meir å tilby ein forretningspartnar, seier Holland.
Are Guttelvik kjem opprinneleg frå Molde, men jobbar som matematikk- og naturfaglærar på Lørenskog. Han budde ei stund i Yorkshire, men utan å ha fått noko favorittlag i England.
– Så la eg merke til at Scarborough rykka opp i ligaen i 1987 – det aller første laget som gjorde det etter at resten av ligasystemet vart knytta til The Football League. Eg hadde aldri vore i den byen før, sjølv om han ligg i Yorkshire. Då tenkte eg at her var laget eg vil følgje, seier han.
Scarborough er ein tradisjonell badeby og ferieby ut mot Nordsjøen nord i England.
Følgde klubben eit heilt år
Første turen over til Scarborough gjekk i 1989.
– Og så har det berre balla på seg, seier Guttelvik. I sesongen 2013-14 tok han permisjon utan løn for å følgje laget i alle kampane, og dei siste åra har han elles vore over rundt 15 gonger årleg.
– Det er ingen vits i å spørje kvar eg skal på ferie. Det blir Scarborough, anten det er sommarferie, vinterferie eller juleferie, seier han.
I løpet av desse åra har han også grunnlagt ein norsk supporterklubb som i dag tel 130 medlemer.
Dramatisk nedrykk vart vendepunkt
Scarborough heldt seg i ligaen i 12 år, men vart den tapande parten i eit ekstremt tett nedrykksdrama i 1999.
Med 1-1 i siste kamp var dei på trygg grunn då fløyta gjekk. Men på grov overtid i ein annan kamp gjekk keeper fram på ein corner og scora for Carlisle. Dermed måtte Scarborough ned til Conference (nivå 5).
Nedturen heldt fram. Berre nokre få enkelte lyspunkt var å spore i dei neste åra, mellom anna cupkampen mot Chelsea i 2004. Kampen vart vist på Sky, og Chelsea vann berre 1-0.
– Vi tente gode pengar på den kampen. Men dessverre var det litt for mange av leiarane som tok ut litt for store utbyte til seg sjølv, seier Are Guttelvik.
Konkurs og ny klubb
Det gjekk utforbakke med klubben, som gjekk konkurs i juni 2007.
– Då bestemte supporterane seg for å starte ein ny klubb. Vi var rundt 450 stykke som stod bak initiativet, seier Guttelvik. Klubben blei skipa berre to veker etter konkursen, tok namnet Scarborough Athletic, og adopterte også dei gamle raude draktfargane.
Men bane hadde dei ikkje. Den hadde gått med i dragsuget til den gamle klubben, og kommunen hadde overteke. I staden vart det tur til Bridlington kvar heimekamp.
No er Scarborough Athletic på nivå 8, og vart nummer seks i si avdeling i fjor, to små poeng unna playoff. Det er klubbens beste plassering.
I år er det opprykk som gjeld. Første ligakamp i den nye sesongen blir spela i dag.
– Kan kome tilbake til ligaen
– Skal vi rykke opp, må vi vel også ha ein administrasjon, seier Guttelvik. – Vi har ikkje eingong ein dagleg leiar.
– Kor langt oppover i ligasystemet trur du klubben kan kome?
– Til League Two (nivå 4), kanskje. Der har vi vore før. Eller til og med League One, om vi har dei rette folka i rett posisjon, trur han.
Banesaka har vore sentral heilt sidan dagens klubb vart stifta. Men det har vore vanskeleg, for reguleringsplanene har kravd at området for den gamle bana skal brukast til idretts- og friluftsføremål. Derfor har det vore vanskeleg for kommunen å selje.
– Først no heilt nyss er det i orden. Reguleringsplanene er omsider endra, og området kan seljast til andre føremål. Derfor har kommunen no endeleg råd til ny bane. Det blir stort for klubben, seier Guttelvik.
Ikkje styremedlem
Guttelvik er ein svært sentral mann i klubben, men han er ikkje styremedlem. Ikkje enno, iallfall.
– Nei, det ville ikkje gått når eg bur i Norge. Det er også viktig med størst mogeleg lokal forankring.
– Men eg ser ikkje bort frå at eg kjøper hus og flytter dit når eg blir pensjonist, seier Are Guttelvik.