– Eg les mykje. Bøker om meditasjon. Akkurat no les eg ei bok om leiarskap av Phil Jackson, den tidlegare basket-trenaren for Los Angeles Lakers og Chicago Bulls, og det lærer meg korleis eg skal finne min plass i ei gruppe, seier Evra i eit intervju framfor kampen mot Sveits fredag.

Den franske venstrebacken har brukt meditasjon ei stund, og seier at han kjenner seg som eit barn ute på bana.

– Lykkeleg som ein åtteåring

– Eg kjenner meg som ein åtteåring, det er same alder som son min Lenny. Eg kjenner meg lykkeleg både på og utanfor bana, seier den språkmektige 33-åringen frå Manchester United.

Diplomatsonen Patrice Evra med 25 søsken, fødd i den tidlegare franske kolonien Senegal, snakkar flytande fransk, engelsk, italiensk, spansk og portugisisk, og prøver også å lære seg koreansk – for å lettare kunne snakke med sin tidlegare lagkamerat Park Ji-sung.

– No gir eg alt for laget og lagkameratane. Eg har meir erfaring, og eg kan halde meir distanse der det trengst. No er mi oppgåve her i VM å hjelpe til slik at alle gjer sitt beste for laget, seier Evra.

Også Giggs, Ferdinand - og Suarez

Han er ikkje den einaste i Manchester United som brukar meditasjon som ein del av treninga. Ryan Giggs og Rio Ferdinand har i lenger tid gjort det same. Giggs seier at meditasjon og yoga var det som hjelpte han til å spele til han var 40.

Allereie i 2012 fekk Patrice Evra beskjed om å begynne med meditasjon , saman med Uruguays og Liverpools Luis Suarez. Det var beskjeden frå PFA, organisasjonen til dei profesjonelle spelarane i England.

Bakgrunnen var at Suarez hadde fått åtte kampars utestenging for rasistiske utsegner til Evra. Då Liverpool og United møttest for første gong etter utstenginga, ville ikkje Suarez handhelse på Evra.

Vil hjelpe, ikkje kritisere

Og utdjupar:

– Om ein lagkamerat ikkje gjer det så bra, vil eg ikkje hisse meg opp og kritisere han. Eg vil oppmuntre han, og kjenner nok samstundes på at det er litt mi skuld også at han ikkje får det heilt til. Derfor vil eg prøve å hjelpe han. Det er slik eg kjenner meg no, seier Evra.

Lykka har ikkje alltid smilt til Evra. I 2010 fekk han skulda for å vere hovudmannen bak «den franske revolusjonen» – spelarane sin treningsboikott og protest mot at Nicolas Anelka vart send heim frå VM i Sør-Afrika. Evra var kaptein for det franske laget, som vart slått ut i gruppespelet og måtte reise heim i skam . Han vart utestengd frå landslaget i fem kampar som straff.

– Det som skjedde då, tappa meg for energi. Eg tok nok kapteins-oppgåva altfor alvorleg, seier Evra.

• Les: Fransk tropp i oppløysing i 2010

– 2010 er historie

No er han tilbake i laget, men han er ikkje lenger kaptein.

– Det er ei ære å vere kaptein, men det er ikkje noko prioritert mål for meg. Eg er kaptein på Manchester United, og det er nok for meg. Det som skjedde i 2010, er historie, seier Evra.

Han kom ikkje på talefot med Raymond Domenech, landslagssjefen i 2010. To år seinare vart Didier Deschamps sjef, ein mann Evra kjenner godt frå før.

– Det var avgjerande for meg då eg sa ja til å halde fram på landslaget. EM 2012 var friskt i minnet, der gjekk det ikkje så godt for oss. Derfor nølte eg litt, men eg sa likevel ja då Didier tok over. Om eg ikkje er god nok, vil han sjå meg inn i augo og fortelje meg det. Då aksepterer eg å ikkje få spele. Eg har stor respekt for han, og det er godt å arbeide saman med han.

Stolt av landslaget

– I år er vi eit langt meir samansveisa lag. Og sidan vi blei VM-klare i november, har vi blitt ekstra stolte av å bere landslagstrøya, seier Evra, som har 59 landskampar.

Men han tek ikkje avstand frå si eiga fortid, sjølv om han no er endra, ikkje minst på grunn av meditasjonen.

– «Pat» av 2014 er den same som «Pat» av 2010. Eg er glad i dei begge. Og eg må nok vedgå at eg er glad i meg sjølv også. Det høyrest kanskje arrogant ut, men eg likar ikkje å kritisere meg sjølv, seier ein tankefull Patrice Evra.

Han les aldri om seg sjølv på nettet eller i avisene. – Det viktigaste for meg er kva spelarane, støtteapparatet og supporterane meiner om meg. At media ofte framstiller meg som ein «badboy» etter det som skjedde for fire år sidan, gjer meg ingenting, seier han.

– Benzema er stjerna

No er Evra på eit lag der han trivst.

– Karim (Benzema) er stjerna på laget, det er han vi andre skal fóre med ballar. Olivier Giroud, Valbuena, Antoine Griezmann og Loic Remy er også gode angrepsspelarar, men Karim har vunne meisterligaen og har ein annan dimensjon, seier Patrice Evra.

– På alle lag eg har spela, har eg sagt at vi treng ein god målscorar. Vi er heldige, vi har Karim.

– Vår eigen verste motstandar

Frankrike opna VM med solide 3–0 over Honduras , og Benzema scora to av måla. Fredag står Sveits for tur, seinare Ecuador. Frankrike er favorittar.

– Eg trur ikkje vi endrar noko før kampen mot Sveits. Vi er i flyten, og vi har harmoni i troppen. Men vi er aldri immune mot at nokon bryt ut av gruppa og vil handle på eiga hand. Slikt kan skje fort i fotball. Det viktigaste av alt er at vi er eit lag, ikkje ein gjeng individualistar, seier Evra.

– Det er når alt ser ut til å gå på skinner, at ein kan vere på sitt mest sårbare. Vi må ha den rette innstillinga. Slik eg ser det, er vi vår eingen største motstandar.