– Ja, dette kan bli sesongens dyraste tur for oss, seier Bodø/Glimts Håvard Sakariassen. Hans lag skal reise til Kirkenes. Det er 1216 kilometer, eller halve Norge på langs. Ein veg.
Det andre eliteserielaget frå Nord-Norge, Tromsø, skal sørover til Mo. Dit er det 674 kilometer, ifølgje oversikta som har utarbeidd.
Tur-retur må dermed dei to nordnorske laga reise 3780 kilometer. Dei 14 sørnorske eliteserieklubbane reiser totalt 1450 kilometer. Der har Aalesund den lengste reisa, på 126 kilometer. Dei skal til Stryn.
Sekssifra beløp
Sakariassen reknar med at denne turen åleine kjem på over 100.000 kroner. I tillegg kjem overnattingsutgifter, som følgjer med ein så lang tur.
Det er ikkje berre-berre for ein klubb med ein allereie pressa økonomi.
– Vi har ingenting mot turen til Kirkenes eller kampen mot dei. For turen sin del er det fint, seier han til Avisa Nordland.
Det er Norges Fotballforbund som set opp kampane i dei første rundane, og dei betaler ikkje kompensasjon for lange reiser.
– Men vi prøver å fordele dei tyngste reisene og største ulempene frå runde til runde og frå år til år. Då vi sette opp årets første NM-runde, såg vi på kven som hadde dei tøffaste reisene dei siste sesongane, seier Rune Pedersen i Norges Fotballforbund.
Eliteserielaga skal spele borte
Laga i eliteserien skal ha bortekampar dei to første cuprundane, det har klubbane sjølv vore med på å bestemme.
– Vi vil også prøve å variere motstandarane frå år til år, og saman med reisebelastninga inngår det i puslespelet ved å sette opp kampane. Vi gjer så godt vi kan, seier Pedersen.
I tillegg kan tung reisebelastning i tidlege rundar gi fordelar når heime- og bortekampar skal fastsetjast i seinare rundar. Ikkje minst kan det hjelpe når det drar seg til i fjerde runde og kvartfinalene. Det er det ikkje kampoppsett, men trekning.
– Då blir heimebana vald ut frå kor mange heime- og bortekampar laga har tidlegare. Om det står likt, blir det reisebelastninga i dei tidlegare rundane som vanlegvis blir avgjerande, seier Pedersen.
