Lysglimt i tøff kvardag: Båtflyktningane som rykka opp

Eit lag samansett av berre afrikanske båtflyktningar i Italia har greidd å rykke opp frå lågaste divisjon i det italienske fotballsystemet.

Koa Bosco

Båtflyktningar frå Afrika: Koa Bosco sende eit lys av glede inn i flyktningleiren med sitt opprykk

Foto: Adriana Sapone / Ap
Arve Lote byline
Journalist

Spelarane på laget bur i telt og containerar i ein flyktningleir i byen San Fernandino i Calabria-regionen sør i Italia – eitt av dei fattigaste områda i landet. Alle er flyktningar som har kome over Middelhavet i håp om eit betre liv i Europa.

Laget heiter Koa Bosco og vart skipa av den katolske presten Don Roberto Meduri i 2013. Klubben var stifta med tanke på å integrere flyktningane i eit nærmiljø prega av sterk motstand og fiendtlege haldningar mot dei mange flyktningane som kjem over havet.

Klubben er driven og trena av lokale italienarar, og har spela i Terza Categoria, niande og lågaste nivået i den italienske seriepyramiden.

Laster Twitter-innhold

– Ein tøff kvardag

Flyktningleir i Italia

Dette er heimen og nærmiljøet til spelarane på Koa Bosco

Foto: Adriana Sapone / Ap

– Dei har teke ein stor siger, men dei har framleis ein tøff kvardag, seier klubbdirektør Domenico Bagal til ilcalciomagazine.it .

Til dagleg har spelarane strøjobbar i sitruslundar og gardsbruk i nærområdet. Og lokale innbyggjarar har sponsa spelarane med ullteppe og varme klede

– Det er ikkje lett å administrere eit slikt prosjekt, for problema er mange. Vi takkar alle som har gitt oss ein hand, og det viktigaste er smilet til spelarane som gir tilbake med offer og engasjement, seier Bagal.

Laster Twitter-innhold
Yaya Diallo, kaptein

Kaptein Yaya Diallo gler seg over opprykket, men har som alle andre i flyktningleiren ein tøff kvardag

Foto: Adriana Sapone / Ap

Laget har vekt stor interesse. Juventus-direktør og tidlegare toppspelar Pavel Nedved har aktivt støtta klubben, og inviterte laget på besøk.

Men vegen fram mot opprykket har ikkje vore berre fryd og gaman. I ein kamp i mars vart spelarane angripne med steinar og rasistiske tilrop. Spelarar barka saman på tørre nevane, og kampen måtte avbrytast. Begge klubbane vart straffa.

– Vårt problem er dommarane. Alle avgjerder går mot oss, sa Ali Trauri, ein av spelarane.

Men det er gløymt no når opprykket er klart.

– Eventyr skjer framleis i fotballen, seier trenar Domenico Mammoliti.

Fotballnyheter

Videoklipp

En meget spesiell scoring signert Zlatan Ibrahimovic så ut til å gi Manchester United 1-0-seier mot Everton i Premier League, men et sent straffespark ga 1–1 og uavgjort.
Bournemouth vant 4-3 over Liverpool. Se høydepunktene fra kampen her.
Sergio Agüero og Fernandinho fikk røde kort i kampen mot Chelsea.
LSK Kvinner vant 2-0 over Røa i cupfinalen. Komm.: Christian Nilssen og Tom Nordlie.