Formel 1-stjerne slår alarm: – Kor mykje skal vi lide?

Sainz og dei andre Formel 1-førarane sit godt beskytta i dei superraske Formel 1-bilane. Medan dei sit stroppa fast dundrar bilen opp og ned på asfalten.

Det tærer på kroppen.

– Kor mykje skal ryggen og helsa til førarane lide i karrieren på grunn av bilfilosofi? spør Sainz ifølgje BBC.

TV-bileta frå Formel 1 visar korleis hjelmen går som ei nål i symaskina.

«Hoppande» bilar

Nye reglar rundt aerodynamikk vart innført før sesongen. Det var for å gjere forbikøyringane enklare, men ny utforming av bilane gjer at dei sprett meir enn før.

Fenomenet blir kalla «porpoising» og det skjer når bilen kjem opp i ekstreme hastigheiter, og då sprett bilen opp og ned etter kvart som marktrykket kjem og forsvinn.

Sainz seier at han likar dei nye reglane, men at det har teke på for nakke og rygg dei siste vekene. Kroppen er forverra frå tidlegare sesongar.

– Eg har gjort rutinesjekk av ryggen og stivleik i nakke, og i år er musklane strammare overalt. Ein treng ikkje vere ekspert for å skjønne at ti år med dette kjem til å bli røft, seier Sainz.

Det er ekstra spenning rundt Ferrari-stjerna denne helga, sidan løpa blir køyrde på heimebane i Barcelona.

– Kjensla gir meg ekstra spenning. Eg håpar det gir meg eit løft, seier Sainz i eit intervju med arrangøren.

– Velkommen etter

Etter svake resultat slo Sainz tilbake med pallplass i Miami førre løp. No kjenner han seg heime både i Spania og i førarsetet.

Det har ikkje vore tilfellet for Lewis Hamilton. Sprette-problemet har vore størst for Mercedes; bilane deira ser ut til å bli meir prega av dei nye reglane enn konkurrentane sine.

Superstjerna har rasa ned på listene. Tredjeplassen i sesongopninga er Hamiltons beste resultat etter fire løp.

– Velkommen etter, seier Fernando Alonso, veteran i feltet.

Han er tidlegare verdsmeister og lagkamerat med Lewis Hamilton, og meiner det ligg i naturen til sporten at det same laget ikkje alltid har best bil.

– Lewis er ein like god sjåfør som dei siste åtte åra. No køyrer han ei formidabel runde, og likevel er han sekundet bak. Vi ser at det er viktig å vere ein god sjåfør, men ikkje avgjerande, seier Alonso til BBC.

– Av og til har du ein betre bil, nokre gonger har du ein litt svakare og må kjempe hardare for å komme deg framover.

I VM-samandraget er Lewis Hamilton nummer seks. Charles Leclerc leiar framfor fjorårsvinnar Max Verstappen.

– Vi har mykje igjen på tanken, seier Verstappen i eit intervju med arrangøren.