Ifølgje nettstaden insidethegames.biz kjem styremøtet i det internasjonale friidrettsforbundet (IAAF) denne veka til å gå inn for dette. Forslaget har mellom anna støtte av IAAF-president Sebastian Coe.
Det blir foreslått å kutte 50-kilometeren ut av programmet for meisterskap allereie frå VM 2019 og OL 2020.
Mellom dei som har signert oppropet, er Håvard Haukenes. Han har årets beste tid denne sesongen etter sigeren i Slovakia for to veker sidan. Og han tok ein imponerande sjuandeplass på distansen i OL i Rio i fjor.
– Dette er eit politisk vedtak som vi ikkje kan gjere noko med. Vi ser framover mot VM i år og EM neste år, der 50-kilometeren i alle fall står på programmet, seier landslagstrenar Stephan Plätzer til NRK på telefon frå kappgjengarane sitt høgdeopphald i Arizona.
– Diskuter det etter 2020-OL
POTESTERER PÅ FORSLAGET: Håvard Haukenes har verdsbeste tid i år, og er blant dei mange som har protestert på planene om å fjerne distansen
Foto: Cornelius Poppe / NTB scanpix– Men det er ikkje heilt bra dersom øvinga blir teke bort frå meisterskap før OL i 2020. Det er det som er det langsiktige målet for alle no. Ein kan heller setje seg ned å diskutere framtidg program etter det, seier Plätzer.
– Eg håpar og trur at Norge vil kjempe for at 50 km skal bli på programmet iallfall til Tokyo-OL i 2020. Der vil Håvard bli eit medaljehåp, seier Plätzer.
– For ein gammal femmilskappgjengar kjennest det litt rart dersom øvinga blir kutta ut. 50 km er ei heilt anna øving enn noko anna i friidrett, seier Trond Nymark.
Han tok VM-gull i Berlin i 2009. Eit gull han først fekk mange år etterpå, fordi russaren som gjekk først i mål, blei tatt for doping.
Halvmaraton og mix-stafett
– På 50 km må du så i kjellaren at du rett og slett er utsliten. Har du gjennomført ein 50 km, kan du ikkje konkurrere igjen på fire til seks veker.
Også 20 km skal bort. I staden skal det vere ei kappgang-øving for kvart kjønn – 21,1 kilometer, tilsvarande halvmaraton.
I tillegg ligg det på bordet eit forslag om ei tredje kappgang-øving: Ein miks-stafett over 4 x 5 km.
Bakgrunnen er ønskjet om like mange øvingar for menn som for kvinner. I dag er det to kappgangsøvingar for menn på meisterskapsprogrammet, 20 og 50 km. Kvinnene får berre gå 20 km.
Utøvarane meiner det bør gå motsett veg. Dei meiner kvinnenes fysikk tilseier at også dei kan gå 50 km.
Stephan Plätzer meiner det er realistisk.
– La kvinnene starte kanskje ein halv time før mennene i same konkurranse. Slik gjer dei det i maraton, kvifor ikkje i kappgang? spør han.
For langdrygt?
Ei anna grunngjeving er frykta for at 50 km er ei for langdryg øving, og at publikumsinteressa er for dårleg.
– Det trur eg ikkje. I Berlin-VM var det heilt fullt av folk rundt løypa. Og den vekslinga om tetplassane som var i Rio-OL var god reklame for 50 km kappgang, seier Nymark.
