FIS-toppar negative til skiflyging for kvinner: Altfor få er gode nok

Maren Lundby og dei beste av dei andre har eit brennande ønskje om å få setje utfor dei aller største bakkane.

– Kor mykje ønskjer du å hoppe skiflyging, på ein skala frå 1 til 10?

– Eigentleg knuser eg den skalaen greitt, seier Maren Lundby, til NRK.

15-årsperspektiv

I 2004 fekk mellom andre Anette Sagen og Line Jahr prøve seg som prøvehopparar før mennenes skiflygingsrenn i Vikersund. I dag, 15 år seinare, har kvinnene enno ikkje fått lov å konkurrere i skiflyging.

Det er fordi sterke krefter i internasjonal hoppsport ikkje vil det. Påtroppande renndirektør for hopp i FIS, Sandro Pertile, er ikkje uvillig til ideen, men han vil ikkje setje noko tidsramme for å få det til.

– Vi prioriterer å lage målsetjingar for hoppsporten i dei neste 15 åra, og dette er eit område vi skal evaluere i den arbeidsgruppa som vi skal setje ned, seier Petile.

– Du blir ikkje betre til å hoppe skiflyging dersom du aldri får prøve. Vi må begynne ein stad, kontrar Maren Lundby.

Ho har vunne både OL-gull, VM-gull og verdscupen, og meiner at å hoppe langt over 200 meter er det råaste ein kan gjere som skihoppar.

– Skiflyging er min største draum

– Då er det kjedeleg å sitje år etter år å sjå gutane hoppe skiflyging når du veit du kunne meistra det sjølv, seier ho.

Også mange av konkurrentane drøymer om å få hoppe i dei aller største bakkane.

– Vi er klare for skiflyging vi. Eg håpar vi får lov til det snart, seier Chiara Hölzl frå Austerrike.

– Skiflyging er den største draumen min. Eg håpar kvinnene slepp til i dei bakkane snart, seier tyske Katharina Althaus.

– Berre vi får hoppe der, så er det greitt. Det treng ikkje vere verdscup, seier Anna Odine Strøm.

Håpar på skiflyging i VM 2022

Norges landslagstrenar Christian Meyer håpar kvinnene får hoppe skiflyging i verdscupen neste sesong, og under VM på heimebane i 2022.

– Tenk for ei ramme om vi hadde fått til det. Om vi hadde fått på plass sponsorar som hadde ført til at det hadde gått i hop økonomisk. Det hadde blitt tidenes show, det er eg sikker på, seier Meyer.

No har kvinnene 11 verdscup-konkurransar i stor bakke, men framleis er det mektige menn som meiner dei ikkje fysisk eller mentalt er gode nok til å setje utfor skiflygingsbakkane.

Oppvisning eller renn?

Avtroppande FIS-direktør for hopp, Walter Hofer, grunngjev skepsisen slik:

– Alle er i stand til å konkurrere i vanlege storbakkar, og eit par av dei er også i stand til å konkurrere i skiflygingsbakkar. Men det er få. Vil de ha ei oppvisning med tre utøvarar, eller vil de ha eit renn? spør Hofer retorisk.

Hans etterfølgjar Sandro Petile deler Hofers synspunkt.

– Skiflyging er hoppsportens formel 1. Det er både fysisk og mentalt utfordrande. Ein skiflygingskonkurranse kan ikkje berre vere for dei få. Det må vere verdsomspennande breidde i feltet av utøvarar, seier Petile.