– Eg er veldig glad. Trur alle er veldig glad i dag. Det er første gong i år vi spelte som Rosenborg i år, sa Samuel Adegbenro, som leverte sterkt på kanten i dag, til Eurosport etter kampen.
RBK-trenar Eirik Horneland kunne dermed puste letta ut og det var ein nøgd trenar som møtte pressa etter at kampen var over.
– Eg synst det var ein bra kamp. Tre viktige poeng, men vi skal ha fleire mål og vinne med, sa Horneland til NRK etter kampen.
Likevel måtte han konstatere at det nok ein gong var glissent med publikum på Lerkendal.
– Det er fordi det har vore for dårlege prestasjonar over tid. Vi må vinne fotballkampar og skape entusiasme, for å få folk tilbake.
Fleire trur kampen om seriegullet er tapt
Suspenderte Pål André Helland var derimot ikkje like optimistisk før kampstart. Han har alt gitt opp seriegullet.
– Vi vinn ikkje serien i år, det gjere vi ikkje. Det har vi ikkje sjanse på, sa midtbanespelaren til Eurosport før kampen starta.
Han meiner laget i staden må klamre seg til det siste halmstrået, som er å prestere i Europa, for at sesongen ikkje skal bli heilt skandale.
Også kaptein Mike Jensen er skeptisk til om trønderane i år kan vere med å kjempe om seriegullet til slutt.
– Vi må gløyme og tenke på det akkurat no. Vi tenkjer på ein kamp om gangen, men sånn situasjonen er no, så vi eit stykke bak.
Trenar Horneland vil derimot ikkje gi opp kampen om gullet.
– Nei, vi kan aldri sei at det er tapt før det er teoretisk umogeleg. Vi har tru på oss sjølv og trur vi skal vinne mange kampar framover, men vi er avhengige av at dei som er føre oss går på nokon smellar også, seier han til NRK.
Pressa frå start
Både Kristiansund og Rosenborg hadde kvar sitt cuptap og 120 minutt i beina frå onsdag i bagasjen, då dei møttest på eit regntungt Lerkendal.
Det var utan tvil heimelaget som kom best i gang og presset var til tider massivt, i det som må vere ein av laget sine beste kampar så langt i år.
Men det skulle gå til overtid i første omgangen før RBK kunne sleppe jubelen laus.
Kristiansund sin Aliou Coly dundra inn i Samuel Adegbenro og dommaren peikar på straffemerket til store protestar for gjestane. Kaptein Mike Jensen gjekk fram og sette den ikkje spesielt godt i mål. Målvakt Sean McDermott kastar seg i rett retning og får ei hand på ballen, men ballen sprett opp i mål.
Snytt for straffe
Heimelaget var då alt snytt for ei straffe. RBK sin David Akintola får hovudet på ballen, etter innlegg frå Adegbenro. Ballen går rett i armen på Christoffer Aasbak, men dommaren ser det tydelegvis ikkje.
Alt etter 33 minutt burde Alexander Søderlund sørga for leiing til Rosenborg. Meling slo ein flott tunnel ved dødlinja. Ballen hamnar via ein Kristiansund-spelar, før ballen sprett heile vegen til bakarste stong. Men Søderlund bommar ifrå tre meter og skaut ballen over mål.
Sjølv om andre omgang vart mållaus kan RBK-trenar Eirik Horneland dermed få eit lite pusterom. Laget klatrar frå ein niande til sjuande plass på tabellen og likt med poeng med Vålerenga og gjestane Kristiansund med 18 poeng. Ti poeng bak serieleiar Molde.