Hopp til innhold

EM-favoritten trassa hjartetrøbbel: – Roing var ikkje viktig, det var meir å overleve

Ask Tjøm (25) er saman med partnar Lars Benske blant favorittane i dobbelsculler i EM etter ein strålande start på sesongen. Men det er ikkje lenge sidan det verka heilt utopisk for førstnemnde.

Ask Tjøm på sykehuset

PÅ SJUKEHUSET: Ask Tjøm kunne ikkje trene på tre månader etter operasjonen som fiksa hjarteproblema hans.

Foto: Privat

– Det var ein definerande augneblink og eg bestemde meg for å prøve litt hardare, seier Tjøm til NRK.

Han snakkar om tida då det vart klart at han måtte operere hjartet. Allereie som 15-åring hadde han fått vite at hjartet hans ikkje fungerte heilt som det skulle, men no hadde det vorte verre enn før.

– I byrjinga påverka det meg berre når vi trena roleg. Eg måtte leggje meg ned og halde beina høgt for å få rytmen inn på rett spor. Eg kunne ha over 200 i puls då eg berre gjekk ein tur, fortel 25-åringen frå Tønsberg.

Roing Mediedag

UBEHAGELEG: Tjøm fortel at han fekk over 200 i puls berre av å gå ein lett tur.

Foto: Javad Parsa / NTB

Legane hadde gitt den aktive ungguten klarsignal til å halde fram med å trene og konkurrere, sidan risikoen ved ein operasjon var større enn utfordringane han då hadde med hjartet.

Han måtte berre leve med anfalla som kom sjølv på heilt rolege treningsøkter.

– Det var litt ubehageleg, men det er rart når du er vand til å trene og du er vand til å få litt syre og bli litt stiv. Det kjennest som at du fekk syra berre du låg på sofaen og såg ein film. Det var veldig merkeleg og litt absurd, fortel han om anfalla.

Torsdag startar Tjøm og partnar Lars Benske vegen mot medaljedraumen i EM klokka 12.45. NRK sender roing frå EM-veka frå klokka 10.00.

– Det kjendest ganske alvorleg

Men for omtrent tre år sidan kom anfalla oftare og oftare.

– Etter kvart så byrja det å påverke konkurransar og sånn. Då innsåg eg at eg måtte gjere noko med det.

Samtidig som han kjende hjarteproblema i aukande grad, fekk han gjennombrotet i verdscupen med ein 4.-plass og ein 7.-plass.

Men ein operasjon var ikkje til å unngå.

– Det opplevast kanskje ikkje alvorleg, men du tenkjer over kva du bruker tida di på, erkjenner han.

Ro-VM i Østerrike

SAT TILBAKE: Her er Tjøm i aksjon under VM i Austerrike i 2019, eit snautt år etter hjarteoperasjonen.

Foto: Estela Reinoso Maset / NTB

Først under operasjonen hausten 2018 fekk han vite at tilstanden hans var medfødd og kallast Wolff-Parkinson-White-Syndrom. Noko som betyr at han hadde ei rekkje ekstra leidningsvegar som forstyrra hjarterytmen.

Kirurgane brende av ei rekkje nervetrådar, og etter sju og ein halv time var operasjonen vellykka. Men det lovande talentet kunne ikkje trene på tre månader for å la hjartet gro.

Plutseleg var kvardagen snudd heilt på hovudet, og like etter gjennombrotet måtte han leggje årane mellombels på hylla.

– For å vere ærleg var ikkje det så mykje i tankane. Det kjendest ganske alvorleg ut der og då. Roing var ikkje det aller viktigaste for meg, det var meir å overleve, fortel Tjøm.

Les også: EM-drama for Skarstein: Fekk trøbbel etter Instagram-bilete

Birgit Skarstein og stroppa som skapte problem
Birgit Skarstein og stroppa som skapte problem

– Det har vore litt uverkeleg

Men etter kvart kunne Tønsberg-karen trene meir og meir, og no har jobben resultert i dei definitive gjennombrota hans i verdstoppen.

Under den første verdscupen i sesongen i Poznań gjekk han og partnar Lars Benske heilt til topps, og få veker seinare følgde dei opp med tredjeplass i Luzern.

– Det har vore litt uverkeleg, men det har vore veldig gøy òg. Eg kjenner det har vore veldig spennande og eg gler meg til fortsetjinga, seier Tjøm.

Roing Mediedag

OVERRASKA: Landslagstrenar Mark Emke vart teken på senga av Tjøm og Benskes prestasjonar på forsommaren.

Foto: Javad Parsa / NTB

No kjem duoen til EM med forventningar om at dei kan kjempe heilt i toppen. For Noregs nye hovudtrenar Mark Emke var ikkje det ein situasjonen han hadde sett for seg.

– Det var ei overrasking for meg kva dei gjorde i Poznań, og resultatet i Luzern var også veldig bra. Vi må ta vare på denne forma, og sørgje for at dei forbetrar seg litt, så dei kan få dei same gode resultata i meisterskap, fortel nederlandske Emke.

Han skryter av Tjøm og Benskes mentalitet som heile tida er oppteken av jobben som trengst for å oppnå toppresultat.

– Eg kjenner veldig at form er ferskvare, og at ein må pøse på og at ingenting er for gitt. Vi prøver berre å gløyme alt som har skjedd og berre jobbar vidare som om vi ikkje har vunne nokon ting, avsluttar Tjøm.

Les også: Skarstein fortvilar over regelendring: – Som å opne kvinneklassen for mannfolk

Roing Mediedag
Roing Mediedag

Siste nytt

  • Vil boikotte skikonkurransar der Russland er med

    Får russarar sleppe til i FIS-konkurransar til vinteren, kan ikkje langrennskomiteens leiar Torbjørn Skogstad sjå for seg at Noreg kjem til start.

    Det internasjonale ski- og snowboardforbundet (FIS) skal først på eit styremøte 22. oktober avgjere om Russland og Belarus blir verande utestengde. Skogstad forventar at sanksjonane blir halde oppe.

    – Ei utestenging er endå meir openberr no enn i februar, seier han til NTB og peikar på den russiske mobiliseringa til krigen i Ukraina.

    Nyleg bidrog ein tale frå FIS' generalsekretær Michel Vion til å så tvil rundt forbundets standpunkt i Russland-spørsmålet. Han blei sitert på at eit russisk comeback kan skje i løpet av kommande sesong.

    – Det er i beste fall ein uheldig utsegn, meiner Skogstad.

    Leiaren for den norske langrennskomiteen utelukkar ikkje boikott av verdscupen og VM i Planica dersom Russland takast inn i varmen igjen.

    Torbjørn Skogstad
    Foto: Terje Pedersen / NTB
  • Eliteserielaget avsluttar heime

    I eliteseriekvalifiseringa seinare i haust vil lag nummer 14 i Eliteserien avslutte heime mot vinnaren av kvalifiseringa i 1. divisjon.

    Norges Fotballforbund gjennomførte trekkinga av heime- og bortekampar i kvalifiseringskampane i haust.

    Kvalifisering til Eliteserien menn:

    Kamp 1: Nr. 14 i Eliteserien – Vinn kvalifisering 1. divsjon.

    Kamp 2: Vinn kvalifisering 1. divisjon – nr. 14 i Eliteserien.

    Kvalifisering 2. divisjon:

    Kamp 1: Nr. 2 avd. 1 – nr. 2 avd. 2.

    Kamp 2: Nr. 2 avd. 2 – nr. 2 avd. 1.

    Kvalifisering til 1. divisjon:

    Kamp 1: Nr. 14 1. divisjon – vinn kvaliifiseirng i 2. divisjon.

    Kamp 2: Vinn kvaliifisering i 2. divisjon – nr. 14 1. divisjon.

    Kvalifisering Toppserien kvinner:

    Kamp 1: Nr. 1 i sluttspelet 1. divisjon – nr. 6 i kvalifiseringsspelet Toppserien.

    Kamp 2: Nr. 6 i kvalifiseringsluttspelet Toppserien – nr. 1 i sluttspelet 1. divisjon.

    Kvalifisering til Eliteserien 2021
    Foto: Heiko Junge / NTB
  • Sjanse for revansje etter 0-8

    Det norske kvinnelandslaget i fotball skal møte England 15. november. I EM-et i sommar enda kampen med eit forsmedeleg 0-8-tap.

    Norges Fotballforbund (NFF) opplyser at kampen skal spelast på spansk jord. England vann EM etter mellom anna å ha slått det norske laget heile 8-0 i gruppespelet.

    I oktober er det sett opp treningskampar mot Brasil og Nederland.

    – Å få møte dei me antek er dei beste og få testa oss på det vi jobbar med, er viktig for oss og noko vi er glade for å få moglegheita til, seier landslagssjef Hege Riise.

    Noreg skal spele ytterlegare éin kamp til i november. Det er ikkje klart kven det blir mot enno.

    EM i fotball for kvinner. Norge - England (0-8)
    Foto: Terje Pedersen / NTB

Sendeplan

Kl. Program Kanal
Spilleliste med 64 klipp
Sport
Spiller nå
Kjønn og religion er ingen hindring 00:45
Neste