– Eg er ikkje bekymra for fysikken. Den trur eg er god nok til å kjempe heilt i toppen, seier den 43 år gamle trebarnsmora.
Orienteringsløparen frå Karmøy, som no spring for Nydalen Skiklub, har ei lang merittliste bak seg med gull både i VM og EM.
Etter dei to første fødslane gav det stor suksess 12 månadar etterpå. Både i Venla 2012 og i 2015, då ho vann O-ringen samanlagt.
Eit år etter sitt tredje barn ventar VM på heimebane i Østfold.
– Eg trur det handlar om at du opplever ein opptur heile det året etter fødsel. Du får ei stadfesting på at kroppen tole meir og meir.
Første svar fekk ho tysdag, då gjekk ho inn og vann kvalifiseringa på mellomdistansen under VM.
Bjørgen tok fire VM-gull
Lista over toppidrettsutøvarar som har gjort det bra etter ein fødsel er lang.
Liv Grete Skjelbreid vart firedobbelt verdsmeister drygt eit år etter å ha fødd sitt første barn.
Marit Bjørgen vart VM-dronning i Lathi med fire gull eit år og tre månader etter sin første fødsel.
– Har du bestemt deg for å satse etter ein fødsel, så må du vere ekstremt kynisk på kva du brukar tida di på, seier Hausken Nordberg.
Trente ei veke etter fødsel
Alt ei veke etter siste fødsel var ho i gang att med treninga. Det begynte med små løpeturar på 30 sekund om gangen.
Før jul var ho oppe i ti timar. No spring ho 14 timar om veka. Nattesøvnen er tilbake og amminga er gradvis kutta ned på.
– Og så veg eg jo 15 kilo mindre, så det er jo den største skilnaden, seier ho med eit smil.
Positiv effekt
Professor Kari Bø på Noregs idrettshøgskole lar seg ikkje overraske over at fleire toppidrettsutøvarar gjere stor suksess etter ein fødsel.
Auka blodvolum og betre oksygenopptak er normalt. Samt at amming kan medføre at man lettare går ned i vekt att.
– For dei fleste er dette noko man har planlagt og gler seg. Livet får ein anna typen meining og det handlar ikkje lenger berre om toppidrett. Dei tøffaste nervane og prestasjonsangsten blir dempa, og det har ein veldig gunstig effekt, seier Bø.
Ho har sjølv laga ein oversikt og samla inn litteratur om tema for IOC.
– Så då burde kanskje fleire toppidrettsutøvarar bli gravide for å betre resultatet?
– Eg veit ikkje om eg skal anbefale det for å bli betre, men eg kan roe utøvarane med at det ser ikkje ut til å ha ein negativ effekt, så lenge man held seg frisk, seier Bø og ler.
– Og så skal det jo passe med fleire ting. Du bør jo helst ha ein partnar, legg ho til med eit smil.
- Mellomdistansen i VM i orientering går av stabelen fredag.