Edvald tapte på målstreken: – Litt surt

Edvald Boasson Hagen vart forbikøyrt like før målstreken og enda på tredjeplass på dagens Tour-etappe. Michael Matthews vann.

Tour-innspurt

NESTEN, EDVALD: Edvald Boasson Hagen var med i teten heile vegen, men blei slått på målstreken

Foto: Peter Dejong / Ap

På oppløpet låg det an til Edvald-siger, men han vart sperra to gonger og var nokre centimeter for seint ute. Matthews var klart framfor nordmannen, og også Peter Sagan var før Edvald over målstreken.

Men uansett tok Edvald Boasson Hagen sin første etappe-pallplass i Tour de France på tre år.

– Rotete oppløp

– Det var litt surt. Eg hadde sjansen, og var ikkje langt unna. Men det var bra å vere med å setje preg på løpet, sa Edvald Boasson Hagen til NRK.

– Spurten var bra, den. Men dei andre var betre, sa han.

– Det var eit rotete oppløp. Men Edvald viser at han er i form, seier NRKs ekspertkommentator Dag Erik Pedersen.

– Det var timinga, ikkje mangel på krefter som gjorde at han ikkje vann, sa Pedersen.

Første etappesiger

Michael Matthews

FØRSTE SIGER: Michael Matthews kan glise breitt over sin første etappesiger i Touren

Foto: JEAN-PAUL PELISSIER / Reuters

For Matthews var det den aller første etappesigeren i Tour de France. Den australske Orica-ryttaren hadde to lagkameratar med seg i brotet, og dei ofra seg for Matthews.

– Dei gjorde ein god jobb for meg. Det var ikkje meininga å gå i brot, men når vi gjorde det, makta vi å gjere det som eit lag. Dei ofra seg for meg, sa Matthews etterpå.

– Eg har ikkje ord for dette, sa han.

Cavendish meistra grøntrøya

Med sin andreplass overtok også Sagan leiinga i kampen om den grøne poengtrøya. Sagan tok i tillegg poenga i den innlagde spurten, og er no 38 poeng framfor Mark Cavendish.

Cavendish kom i mål i hovudfeltet, 9.39 bak vinnaren. Der sat også Chris Froome, som framleis har den gule leiartøya.

Seks mann var i gruppa som spurta om etappesigeren. Nokre meter før mål såg det ut som om nordmannen både var i beste posisjon og hadde fart nok. Men det heldt ikkje heilt inn.

15 mann i tidleg brot

Edvald Boasson Hagen var likevel med på å setje farge på heile etappen.

Ei gruppe på 15 ryttarar braut tidleg ut. Der var Edvald med, saman med lagkamerat Stephen Cummings.

Dei hadde på det meste sju minutts leiing på eit hovudfelt som aldri var interessert i å ta opp jakta på alvor.

Med to mil igjen drog sju av ryttarane i tetgruppa frå og fekk raskt ei leiing på eit minutt. Edvald var med i den gruppa, saman med mellom andre Peter Sagan.

Tourens tiande etappe opna med ei knallhard stigning opp mot Port d'Envalira på 2408 meter. Deretter gjekk det bratt utfor, og til ei relativt flat avslutning på den 197 km etappen.

Sondre Holst Enger kom i mål som nummer 135, Alexander Kristoff 164 og Vegard Breen 165.

Siste nytt

  • Vålerenga kjemper om europa-seier

    Vålerenga Sjakklubb, med Magnus Carlsen i spissen, kjemper om seiren i europacupen. Etter den femte runden ligger de på en fjerdeplass, på lik poengsum som Alkaloid, som leder. Det gjenstår to runder.

    Europacup i sjakk
    Foto: Jack Nilssen / Vålerenga Sjakklubb / NTB scanpix
  • Carlsen fortsatt verdensener

    Magnus Carlsen var presset før møtet med Shakhriyar Mamedyarov, men med remis i europacup-kampen topper han fortsatt verdensrankingen.

    Carlsen måtte unngå tap for ikke å miste posisjonen han har hatt siden 2011. Det greide han uten store problemer.

    Magnus Carlsen etter Norway Chess i Stavanger 2018.
    Foto: Carina Johansen / NTB Scanpix
  • FA vil straffe Mourinho

    Det engelske fotballforbundet (FA) har åpnet sak mot Manchester United-manager José Mourinho etter seieren mot Newcastle. Mourinho kom med uttalelser på portugisisk foran et TV-kamera. Uttalelsene var ifølge FA «fornærmende og grove, og var upassende».

    Jose Mourinho
    Foto: Oli Scarff / AFP

Sendeplan

Kl. Program Kanal
Sport i dag
Nasjonsligaen: Norge - Bulgaria