Irritert svenske rasar etter utydeleg kommunikasjon: – Det brestar

Calle Halfvarsson tok nemleg den siste pallplassen etter Klæbo og Pål Golberg, men så oppdaga juryen at svensken hadde tatt steget utanfor løypa.

Det er ikkje lov å gå utanfor løypa, men den beskjeden hevdar Halvarsson at han ikkje hadde fått. No meiner han at Fis ikkje vil han noko vel.

– Det hadde vore ei fin helg om det ikkje hadde vore for disken. No tok dei frå meg pallplassen. Dei ville vel ha ein italienar på pallen, seier han til NRK.

– Kva meiner du med det?

– Eg antek at dei heller ville ha ein italienar på pallen fordi vi svenske og norske øydelegg sporten deira, seier han tydeleg irritert og forlèt stadion.

Renndirektør Michal Lamplot avfeiar kritikken.

– Juryen er eit nøytralt organ. Medlemma er frå ulike nasjonar, og juryens oppgåve er å sørgje for trygge og rettferdige konkurransar. Utøvarane sin nasjonalitet er ikkje relevant når juryen tek avgjerder, seier Lamplot til NRK.

– Brestar i kommunikasjonen

Før Halvarsson gjekk sin veg, forklarte han meir utdjupande om situasjonen.

Han meiner at juryen i Det internasjonale Skiforbundet (Fis) har vore utydelege i kommunikasjonen før start.

– Vi fekk beskjed i dag tidleg at det ikkje var lov å passere granbarane på vegen i utforkøyringa. Og det seier seg sjølv, for då tek ein innersving, og det er juks. Men på vegen opp tykkjer eg det må vere lov å ha skia utanfor så lenge ein held ein ski innanfor traseen. Det har vore lov tidlegare, seier Halvarsson.

Han legg til:

– Eg tek ingen innersving, eg går ein lengre sving enn alle andre. Og eg er framleis innanfor med skia heile i dag, og det har vore lov før. Eg veit ikkje kvifor det var slik no.

Han tykkjer at Fis kunne ha vore tydelegare i kommunikasjonen.

– Det brestar i kommunikasjonen. Eg tykkjer dei har vore utydelege overfor trenarane våre. Dei skreiv det berre var ulovleg i utforkøyringa, og då tolkar eg det som om det berre er i utforbakkane eg ikkje får passere. Hadde eg visst om det, hadde eg halde meg på innsida og staka forbi, seier han.

Sveriges landslagssjef, Anders Byström, let seg ikkje påverke av diskvalifiseringa.

– Det er berre på papiret det ikkje er ein pallplass, seier Byström til NRK.

Forstår frustrasjonen

Italienske Federico Pellegrino let seg ikkje påverke av kritikken til Halfvarsson, og forstår at han er frustrert.

– Om du ser dei siste ti åra, så er det ikkje mange herrar på pallen. Svenske kvinner, ja, men svenske herrar: Nei. Sjølv i VM eller OL har eg ikkje sett han på palle framfor meg, svarar Pellegrino på kritikken.

Han held fram:

– Eg kan skjønne at det er ein frustrerande situasjon for han. Eg har vore der sjølv mange gonger, og eg veit at neste helg blir det vanskelegare å slå han, seier Pellegrino.

– Er det riktig at han blei diska?

– Eg tenkjer at det er reglar. Det viktigaste vi kan lære dei yngre er at det er reglar sjølv for idrettar. Reglane ute i samfunnet er viktigare, men i dag handla det om å vere smart i dei riktige augeblikka. Klæbo blei ikkje diska, og heller ikkje Golberg. Dei var i front på dei riktige augeblikka, seier Pellegrino.

Skeptisk

Det som det ikkje var noko tvil om, var at Johannes Høsflot Klæbo vann sjølve rennet. Ekspertane er forbausa over kor kontrollert og stabil trønderen har vore i opninga av sesongen, og no trur dei at han kan vinne alle renn han stiller i.

– Fem renn har han gått, og han har vunne alle fem. Mitt spørsmål er: Kan han vinne alle verdscuprenn han går denne vinteren? Eg utelukkar ikkje det, sa Bjørn.

Då NRK spurde andre løparar om det same, rynka spesielt Simen Hegstad Krüger på nasen.

– Er det mogleg å slå Klæbo i den forma han er i dag?

– Ja, det trur eg er mogleg. Johannes er ekstremt god på den plassen her og. Der det ikkje passar så bra for meg, så passar det desto betre for han. Eg veit at vi er andre som kan vinne skirenn, og eg har trua på at vi kan få ein ny vinnar på fredag og forhåpentlegvis ein frå distanselaget, seier Krüger til NRK.

Britiske Andrew Musgrave trur det vil vere vanskeleg for Klæbo å vinne alt, men han påpeiker at ingenting er umogleg.

– Då blir eg imponert. Han er best på alt om dagen, men det skal mykje til å halde ein så god form heile sesongen. Men umogleg er det nok ikkje, han ser jo heilt latterleg sterk ut no. Det er ingenting vi får gjort med han akkurat no, seier Musgrave til NRK.

Går for gul trøye

Klæbo fortel sjølv at han ikkje har tenkt noko over om han kan vinne kvart renn han stiller opp i.

– Vi får berre ta ei helg av gongen, og så får dei såkalla ekspertane diskutere seg i mellom, seier Klæbo til NRK.

– Men kan du det? Vinne seks gull og alt du stiller opp i?

– Eg har ikkje tenkt noko på det. Eg har eit mål om VM, og der skal eg gjere det eg kan for å vere med å kjempe. Fram til då er det verdscupen som gjeld, seier han.

Neste plan på agendaen er å ha nokre rolege dagar heime, før han startar planlegginga inn mot verdscupen på Lillehammer.

Ein ting han er sikker på, er at han skal gå for den gule trøya, men at det ikkje blir lett.

– Ein gjer jo alltid det. Men eg tek ei helg av gangen. Om du skal vinne verdscupen samanlagt, så må du gå skirenn. Det hjelp ikkje å vinne her og der, ein må vere der oppe på alle skirenn. Og ser du på Pål, for eksempel, så er det nesten ingenting som skil oss i verdscupen heller. Det blir spennande, avsluttar han.