– Det blir fantastisk. Vi liker å spele for full tribunar, så eg håper på stor stemning, seier landslagssjef Thorir Hergeirsson om å møte vertsnasjonen Brasil.
I tillegg til Brasil møter Norge Spania, Montenegro, Angola, og Romania.
Alle laga vart trekt etter seeding-systemet, medan Brasil som vertsnasjon fekk velja gruppe. Etter eit par minutt i tankeboksen valde dei gruppa med Norge.
I London 2012 tok Montenegro sølvet, etter å ha tapt 26–23 mot Norge i finalen. I tillegg møter dei Spania, som tok bronse i OL for fire år sidan og bronsevinnaren frå fjorårets VM, Romania.
– Utan tvil den tøffaste gruppa
– OL er ei tøff turnering og det er berre gode lag med. Vi får tøffe og gode motstandarar på rekkje og rad. Det vert ein hard kamp for å ta seg til ein kvartfinale og det vert viktigare enn nokon gong å ta ein kamp om gangen, Hergeirsson til NRK.
– Oi! Det var min første tanke. Det er utan tvil den tøffaste av dei to gruppene. Med unntak av Angola er det berre stormakter, seier NRKs handballkommentator, Patrick Sten Rowlands.
At Brasil valde å gruppa til Norge er han også overraska over.
– Gruppe A er mykje tøffare enn gruppe B, så det er overraskande at Brasil valde den gruppa. Men om Norge skal vinna OL så må dei slå dei beste laga uansett, seier Rowlands.
I OL går dei fire beste laga vidare til kvartfinalen.
Norge var førsteseeda før trekninga, saman med finalemotstandaren frå VM-finalen i fjor, Nederland.
Gruppe A:
- Norge
- Spania
- Angola
- Montenegro
- Romania
- Brasil
Gruppe B:
- Sør-Korea
- Argentina
- Sverige
- Russland
- Nederland
- Frankrike
