– Det er jo slik at ein alltid trur på England, men i år trur eg kanskje litt ekstra.
Arne Scheie set ord på det som har vore gjennomgangsmelodien i engelsk og norsk presse den siste tida.
For det er eit ganske anna England-lag som opnar EM mot Russland i dag enn det me har sett i dei siste meisterskapa.
– For fyrste gong gler eg meg til å sjå England spele på lik linje med Spania og Frankrike, seier NRK-ekspert Lise Klaveness.
Tippar England i semifinale
Det er 50 år sidan England vann sitt siste meisterskap på heimebane. I år meiner både engelske og norske ekspertar at mykje talar for at «Three Lions» kan vere nærmare enn på lenge.
– Tipset mitt er England i semifinalen. Eg meiner England har potensialet til å blande seg blant dei fire beste. Dei har vore meir overbevisande i treningskampar og kvallik enn for eksempel Belgia og Italia, meiner Klaveness.
– Det blir nok vanskeleg for England å gå heilt til topps, men alt tyder på at laget bør nå ein kvartfinale eller semifinale. Dei har eit nytt ungt lag, men hugs på at England berre har vore i ein EM-semifinale før, seier Arne Scheie.
Her er fire grunnar til at Lise Klaveness og Arne Scheie trur England endeleg kan lykkast i meisterskap.
- Mange store profilar som kan gjere ting på eigehand og ikkje minst scorar mål, som Jamie Vardy, Harry Kane, Raheem Sterling og Dele Alli.
- Dei har ein sterk keeper med erfaring i Joe Hart.
- Eric Dier kan skjerme litt for midtstopparane, som er svakheiten deira.
- Ungt, offensivt og ikkje minst hurtig lag som er svært viktig i dagens internasjonale fotball.
– Kanskje meir press enn før
Også dei engelske ekspertane er samstemte i at laget minst bør nå kvartfinale.
– Minst kvartfinale. For fyrste gong på lenge er eg spent på Englands sjansar. Hodgson har plukka ut ein modig tropp og håpet mitt er at laget spelar med Premier League-tempo, seier The Guardians fotballekspert, David Hytner.
– England vil nå semifinale. Det treng ikkje å vere for mykje å håpe på om dei vinn gruppa, seier Paul Wilson i same avis.
Likevel meiner mange presset på England frå media i heimlandet er mindre enn dei siste meisterskapa.
– Endeleg kan England reise utan press, seier alle, men derfor har dei jo eit enormt press. Det er jo eigentleg ikkje mindre enn før, kanskje er det meir, seier Klaveness.
For Chris Smalling og resten av laget blir det uansett svært viktig å kome i godt i gang mot Russland i kveld, og ikkje som i Brasil-VM for to år sidan, da England tapte 2-1 mot Italia.
– Eg trur det er svært viktig. Om me får ein god kamp og siger mot Russland kan me bygge sjølvtillit. Det er du må ha når kampane kjem kvar fjerde-femte dag og ein ikkje har tid til å kome over eit tap, seier Smalling.