Set rekord – deltek i sitt 7. vinter-OL

Sidan OL i Albertville i 1992, har den japanske skihopparen Noriaki Kasai og den russiske akaren Albert Demtsjenko delteke i vinter-OL. I Sotsji er begge medaljekandidatar i sine øvingar.

• Nedst i artikkelen kan du sjå oversikt over utøvarane med flest vinter-OL

– Kasai er ein av favorittane til å ta medalje som 41-åring. Det er imponerande, seier hoppkommentator i NRK, Arne Scheie, og legg til:

– Det er hyggjeleg at Kasai framleis er med – det syner kontinuitet i hoppsporten. I Japan er hopparane tilsett av firma, noko som gjer at dei kan halda på lenge.

– Betre enn på lenge

Japanaren er den eldste verdscupvinnaren i hopp, og har utfordra pallen i kvart einaste renn denne sesongen.

– Han er betre enn på lenge. Det vil vera fantastisk moro om han tek medalje i OL, seier Scheie, som meiner hoppinga er meir open enn nokon gong.

Denne sesongen har det vore 14 ulike verdscupvinnarar på 20 renn.

• Les også: Kasai (41) hylles etter sin første seier på ti år

Kasai var distanseløpar

Kasai starta hoppinga i ein alder av ni år. Han har uttala at ingen i familien hans er særleg atletiske. Då han var yngre, var han distanseløpar. Som junior kan han visa til ei tid på 10.000-meteren på 37 minutt.

I førebuinga til OL vart han spurd kvifor han framleis er med. Svaret var kort.

– Fordi eg ikkje har vunne gull enno.

Hans beste individuelle resultat i OL er femteplassen i normalbakken i Albertville i 1992 og åttandeplassen i storbakken i Vancouver i 2010.

Skulle japanaren med kallenamnet «Kamikaze» ta medalje i Sotsji, vert han den eldste skihopparen i OL-historia som gjer det. Per i dag er det faktisk ein nordmann som innehar den rekorden. Birger Ruud var 36 år og 168 dagar gamal då han tok sølv i storbakken i St. Moritz i 1948.

Om nokon trur Sotsji er 41-åringen sitt siste OL – uansett korleis det går – må ein tru om att.

– Eg kjem til å gå for eit åttande OL. Leikane i Pyeongchang i 2018 er i Sør-Korea og eg har lyst å invitera familien min. Sjølv om eg har vore med i mange OL, har eg aldri invitert dei. Eg håpar eg er gift, og kanskje kan eg syna barna mine, sa Kasai nyleg i eit intervju med Japan Times.

Starta med aking fordi han var rastlaus

Demtsjenko starta sin profesjonelle karriere i aking då han var 13 år. Han har òg prøvd bob og skeleton, men utan å satsa.

– Eg har berre hender og hovud, ikkje raske bein, har han uttala.

Russaren vaks opp i ein liten by i Uralfjella, ein region på grensa til Vest-Sibir. Medan naboborna gjekk på ski, prioriterte Demtsjenko aking.

– Eg vaks opp i ein stor familie og var rastlaus. Då eg starta med idrett, klarte eg å koma meg vekk frå gata. Foreldra mine var glad for at eg alltid var under oppsyn av vaksne. Dei er stolte av meg, fortalde Demtsjenko i eit intervju med Voice of Russia i forkant av sesongen.

– Dei veit kva dei driv med

– Den indre motivasjonen er heilt klart avgjerande for at Demtsjenko framleis er med. I tillegg er mange akarar profesjonelle, og har sporten som jobb. Det gjer at dei kan halda på lenge, seier president i Norges ake-, bob- og skeletonforbund, Harald Rolfsen.

Rolfsen er tidlegare akar og mangeårig noregsmeister. Han meiner Demtsjenko er den største utfordraren til tyske Felix Loch, som tok OL-gullet i Vancouver for fire år sidan.

– Han kan vinna, men då må han køyra perfekt. Både Demtsjenko og Zöggeler (Armin, journ. anm.) har ein dårleg start, men resten har dei inne. Starten her i Sotsji er ganske bratt, så dei tapar ikkje så mykje.

Dei eldste akarane har mykje erfaring frå dei ulike banane, og køyrer færre turar.

– Dei veit kva dei driv med og har rutinen, understrekar Rolfsen som er på plass i Sotsji.

I motsetnad til Kasai, har Demtsjenko ein individuell OL-medalje på si merittliste. Den kom i Torino då han tok sølv. Veteranen legg opp etter OL, men ynskjer å halda fram som trenar. Han har ei dotter som òg driv aking. Viktoria (18) tok nyleg sølv i junior-EM.

18 utøvarar har delteke i seks vinter-OL. Kasai og Demtsjenko passerer desse under Sotsji-OL.

NB! Tala gjeld før Sotsji startar. Ole Einar Bjørndalen, finnane Janne Ahonen (hopp) og Teemu Selänne (ishockey), amerikanske Todd Lodwick (kombinert), austerrikske Mario Stecher (kombinert), tyske Claudia Pechstein (skøyter) og den italienske medaljegrossisten Armin Zöggeler (aking), vil med si deltaking i Sotsji også ha vore med i seks vinter-OL.

Kjelde: OlympStats og Infostrada