NRK Meny

Vesle Cibulkova (161 cm) kan vinna Australian Open

Berre tre spelarar i topp 100 er kortare enn Dominika Cibulkova. Den slovakiske jenta kan overraskande ta sin fyrste Grand Slam-tittel.

Dominika Cibulkova

Dominika Cibulkova (t.v.) er berre 161 cm, men har overraskande spela seg fram til finale i Australian Open. Her frå 4. rundekampen mot Maria Sjarapova.

Foto: Aaron Favila / Ap
Randi Himle
Journalist

Artikkelen er flere år gammel.

– Det er absolutt uvanleg, seier NRK sin tennisekspert Jan Frode Andersen om høgda til den slovakiske tennisstjerna.

Til samanlikning er Maria Sjarapova 188 cm, Victoria Azarenka 183 cm og Serena Williams 175 cm.

20. seeda Cibulkova har overraskande spela seg fram til sin fyrste Grand Slam-finale.

– Ho har spela heilt utruleg og har si livs turnering. Ho har nesten ikkje tapt game og berre eitt sett, seier Andersen.

Trass ei tøff trekning, har 24-åringen hatt det lett og nærast blåst samtlege motstandarar av bana. I fjerde runde sende ho verdstrear Maria Sjarapova heim.

Ingen under 161 cm har vunne Slam

Dominika Cibulkova

Dominika Cibulkova jublar etter sigeren mot Agnieszka Radwanska i semifinalen i Australian Open. Femteranka Radwanska vart slått enkelt 6–1, 6–2.

Foto: SAEED KHAN / Afp

Cibulkova er av dei sjeldne utgåvene i kvinnetennisen. I fylgje CNN er det berre tre spelarar i topp 100 som er kortare enn den slovakiske jenta.

I Open-æraen (frå 1968), har det berre vore to spelarar med same høgde som Cibulkova som har gått til topps i Grand Slam. Det var Nancy Richey og Mima Jausovec som vann French Open i høvesvis 1968 og 1977.

Dei to italienske spelarane, Sara Errani (nr. 7) og Roberta Vinci (nr. 12), er heller ikkje av dei høgaste i sporten med sine respektive mål på 164 og 163 centimeter.

Cibulkova er den fyrste slovakar til å koma til ein Slam-finale. Ho er god veninne med Marion Bartoli som vann Wimbledon i fjor, og tek inspirasjon frå den franske tennisspelaren som overraskande har lagt opp.

– Då Marion vann Wimbledon, visste eg at alt er mogleg, uttala Cibulkova i etterkant av sigeren i semifinalen.

– Ho er lynrask

Med mindre rekkevidde enn dei fleste konkurrentane, må 24-åringen kompensera med hurtigheit.

– Ho er fantastisk bevegelig og lynrask, fortel Andersen, og legg til:

– I tillegg har ho ei imponerande evna til å fighta. Ho kjempar heilt vilt. Cibulkova kan slå vinnarar frå begge sider, står høgt i bana og tek ballen tidleg. Svakheita er sjølvsagt serven, men grunnspelet og returen er mellom dei beste.

Det er stor skilnad på dame- og herretennis. I dametennis er ikkje serven så dominerande, og det er langt fleire servegjennombrot.

– Men det er klart du ikkje får ein god serve når du er 161 centimeter, seier Andersen og påpeikar at Serena Williams ikkje hadde vore nummer éin i verda utan serven hennar.

I og med at det har vore så varmt i Melbourne, særleg den fyrste veka, og underlaget er noko raskare enn tidlegare år, sprett ballen lågare.

– Det er ein klar fordel for Cibulkova, seier Andersen.

Trur på kinesisk siger

Li Na

Kinesiske Li Na spelar sin tredje finale i Melbourne, men har ikkje vunne enno. I fjor måtte ho gje tapt for Victoria Azarenka.

Foto: MAL FAIRCLOUGH / Afp

På den andre sida i finalen står kinesiske Li Na. Verdsfiraren har alt vore i to finalar i Melbourne, samt vunne French Open.

– Erfaringsmessig bør det ikkje kunna gå, men klarar Cibulkova å spela slik ho har gjort, skal det verta vanskeleg å slå ho, seier Andersen.

Trass i 24-åringen si kjempeturnering, heller likevel Andersen mot kinesisk siger laurdag morgon. Han trur nervane kjem til å liggja tjukt utanpå kroppen.

– Eg gjev Li Na 60 prosent sjanse på grunn av erfaringa. Eg trur ikkje Cibulkova klarar å produsera det spelet ho synte mot Radwanska, og fryktar ho kan verta nervøs.

Finalistane har møttest fire gongar, der den kinesiske stjerna har vunne samtlege.

Finalen går laurdag morgon.

Siste nytt

  • Gull og sølv i junior-VM i skyting

    Regine Nesheim, Jenny Stene og Jeanette Hegg Duestad sikret norsk gull i lagkonkurransen på 50 meter liggende under junior-VM i pistol- og rifleskyting.

    Trioen vant klart foran USA og Kina. Med totalt 1859,7 poeng ble samtidig juniorrekorden knust med 4,2 poeng.

    På herresiden ble det norsk lagsølv for Henrik Larsen, Jo-Hermann Hegg og Benjamin Tingsrud Karlsen.

  • Ny nordmann klar for NHL-lag

    Kristian Røykås Marthinsen (17) ble valgt da Washington Capitals brukte sitt siste valg i årets draft. Unggutten blir med det den tredje nordmannen tilknyttet en NHL-klubb sammen med Andreas Martinsen (Montreal Canadiens) og Mats Zuccarello (New York Rangers).

    Tatt i betraktning Marthinsens unge alder er det nok likevel en stund før vi eventuelt får se venstrevingen på isen i en NHL-kamp.

    Laster Twitter-innhold

Sendeplan

Kl. Program Kanal