Chelsea tok cupen med to norske jenter på laget

Norges landslagskaptein Maren Mjelde fekk spele heile kampen på verdas kanskje mest kjende fotballarena. Maria Thorisdottir sat på benken i 69 minutt før også ho fekk ta del i cupfesten på Wembley.

45.423 tilskodarar hadde benka seg på tribunene. Det er rekord for ein FA-cupfinale for kvinner.

Cuptittelen er Chelseas andre. Arsenal har 14, men måtte svelgje sitt andre finaletap. For Chelsea blei det ein røt revansje for 1-0-tapet mot same motstandar i finalen for to år sidan.

Første omgang var jamn, men ikkje av dei mest velspela. Men andreomgang levde opp til forventningane.

Bachmann-dobbel

Men det var sveitsiske Ramona Bachmann som blei den største helten med sine to vakre mål. Det første med ei perfekt avslutning i hjørnet to minutt etter pause, det andre med ein lobb som toucha ein motstandar og gjekk over keeper.

– Det er Bachman som styrer showet utpå der, sa BBC-kommentator Sue Smith. – Og det klart beste laget vann, la ho til.

Men Arsenal kom tilbake. Snaue 20 minutt stod att då Vivianne Miedema fekk stå nokså åleine på eit innlegg frå Beth Mead og scora enkelt.

Det heldt i nokså nøyaktig to minutt. Fran Kirby – årets spelar i England – sette inn Chelseas tredje og avgjorde kampen. Ho skar inn frå høgre, mottak med høgre og skrudde ballen inn i hjørnet med venstre foten.

Gravid manager

Chelseas manager Emma Hayes kan vere på veg mot The Double på fleire måtar. Chelsea ligg side om side med Manchester City i toppen av ligaen når fire kampar står att.

I tillegg er 41-åringen 33 veker på veg med tvillingar. Ho sat på benken under kampen, men var ikkje med ute på bana før kampstart. Men ho klarte ikkje å halde seg unna jubelen etterpå.

Kaptein Katie Chapman vann sin tiande FA-cup-tittel. Ho tok fleire av dei for Arsenal mellom 2007 og 2013. Men den aller første tok ho som 14-åring med Millwall i 1997.