Carlsen sin største utfordrar leikar med verdseliten

Levon Aronian syner overtydande taktar i sesongopninga i sjakk i Nederland.

– Han er i kjempeform. Det Aronian syner no er over hans vanlege nivå, seier Atle Grønn.

Armenaren, som vert sett på som ein av dei klart største utfordrarane til Magnus Carlsen, leiar den prestisjetunge turneringa Tata Steel – turneringa nordmannen vann i fjor.

– God i alle fasar

– Det er umogleg å ikkje verta imponert over partia han spelar. Han er nesten feilfri, kreativ og god i alle fasar av spelet, fortel Grønn.

Aronian har ei «prestasjonsrating» på over 2900 i turneringa, noko som er over nivået Carlsen vanlegvis spelar.

«Prestasjonsrating» er eit mål på kor bra ein spelar gjer det i éi turnering.

– Det er berre to til tre gongar Magnus har prestert på same nivå som Aronian no gjer, seier Grønn og legg til:

– Held han nivået, vil han vera storfavoritt til kandidatturneringa i mars.

Vinnaren av kandidatturneringa møter Magnus Carlsen i kamp om VM-tittelen i november.

• Les også: – Anand burde kanskje erkjenna at trona er tapt

Tidlegare verdsmeister Garry Kasparov fylgjer òg godt med på turneringa i Nederland.

Komplett spelar

Den 31-årige verdstoaren har lenge vore nummer to eller tre på rankinga.

– Han er ein komplett sjakkspelar, har eit fantastisk talent, er uredd og har ei original speleforståing, fortel Grønn.

Han meiner Aronian har gode opningar, men ikkje er så allsidig som Magnus. Han ser på Aronian og Carlsen som like kreative i midtspelet, men at nordmannen er meir presis i sluttspelet.

Ifylgje NRK sin sjakkekspert, Torstein Bae, har den armenske stormeisteren ein heilt annan stil enn Carlsen.

– Armenaren er kjend for å vera teoretisk sterk. Han jobbar mykje med opningar for å finna nye trekk, og prøva å ta motstandaren raskt – tilsvarande strategien russaren Garry Kasparov hadde.

Ikkje på Magnus-nivå enno

Bae meiner fortsatt Aronian har eit stykke igjen for å matcha Carlsen.

– Han har ikkje vore like stabil som Carlsen i fleire turneringar på rad. Det som er så spesielt med Magnus, er at han har klart å halda dette nivået i turnering etter turnering gjennom fleire år. Det har me ikkje sett av Aronian enno, fortel han, men legg til:

– Me har venta på at han skal ta eitt steg vidare. Kanskje har han no klart å heva seg eit lite nivå.

Sjakknasjon

Armenia er eit lite land med i underkant av tre millionar innbyggjarar, men sjakk er stort. Aronian har støtte frå ein stor sjakk-kultur.

– Sjakk er folkesport i Armenia. Heile nasjonen backar han opp. Aronian får mykje sjakk-hjelp og får tilsendt analysar frå stormeistrar i landet, fortel Grønn.

Armenia og Aronian har vunne OL i sjakk tre gongar, seinast i 2012. OL tilsvarar verdsmeisterskap for landslag.

Zürich neste for Carlsen

Carlsen er ikkje med i turneringa i Nederland. Han spelar si fyrste turnering etter VM-tittelen i Zürich i slutten av månaden. Zürich Chess Challenge er ei meir eksklusiv turnering med berre seks inviterte deltakarar, i motsetnad til 14 som no spelar i Nederland.

Bae trur nordmannen kan klara å halda forma oppe.

– Magnus har synt tidlegare at han kan gå frå triumf til triumf, noko som berre eigentleg Kasparov har klart før, i alle fall i seinare tid, seier han og legg til:

– Eg trur sjølvtilliten berre har vakse sidan VM. Han er den sterkaste av dei, og kan våga å gå for siger uansett situasjon. Eg trur turneringa kjem til å verta ein suksess for Magnus.

Desse skal delta i Zürich: Magnus Carlsen (nr. 1), Levon Aronian (nr. 2), Hikaru Nakamura (nr. 3), Fabiano Caruana (nr. 6), Boris Gelfand (nr. 8), Viswanathan Anand (nr. 9).