– Dette er ein gledas dag. Vi sat og følgde avrøystinga direkte, sa brytepresident Tom Holmen til NRK.no rett etter at vedtaket i IOC var fatta.
– Eg er letta og glad, seier den aktive brytaren Stig André Berge.
Det vekte sterke reaksjonar då bryting i februar vart kasta ut av OL av styret i IOC. Men brytesporten tok det som ei utfordring, kasta seg rundt og fekk pussa opp idretten sin.
Det hjelpte, for i avrøystinga i dag var brytesporten suveren. 49 av dei 95 delegatane røysta for at brytesporten skulle få plass på OL-programmet. Konkurrentane squash og baseball/softball fekk 24 og 22 røyster.
I prosessen har land med sterke brytetradisjonar kjempa hardt for OL-plassen. Mellom anna har dei tradisjonelle politiske fiendane USA og Iran gått saman i kampen for å få bryting inn i OL igjen.
– Drastiske endringar
– Kva har brytesporten gjort i desse seks-sju månadene?
– Vi har gjort drastiske endringar i organiseringa og gjort bryting meir demokratisk, mellom anna ved å involvere dei aktive mykje meir, vi har i større gard fått med jentene, og vi har endra reglane slik at sporten blir meir attraktiv, seier Holmen.
Han meiner også at IOC sende ut signal om at det var feil å sette bryting ut av OL-programmet. Bryting er ein av dei få idrettane på OL-programmet som også var del av dei antikke olympiske leikane.
– Men ingen røyk utan eld. Vi tok det uansett som ei åtvaring, vi har reist oss som organisasjon, og det er veldig bra, seier Holmen.
Stig André Berge meiner at det er på høg tid med endringar.
– Det betyr enormt mykje både for Noreg og verda at bryting er inne i OL-programmet. Det hadde hatt store negative konsekvensar om det hadde blitt fjerna, og kunne kanskje til og med betydd slutten for idretten over tid, seier Berge til NRK.
Offensiv bryting og kortare kampar
– Kva konkret har de gjort som vil vere merkbart for publikum?
– Vi skal premiere offensiv bryting mykje meir enn før, det blir delt ut dobbelt så mange poeng, og kampane blir kortare. Det skal bli lettare for ikkje-brytekunnige å følgje kampane. Vi har prøvd dette i ein del stemne, og fått kjemperespons tilbake.
– Kva hadde skjedd med brytesporten om de ikkje hadde blitt tatt inn igjen i OL no?
– Det er vere eller ikkje vere. Vi hadde nok eksistert på eit vis utan OL også, men å satse på det nivået vi gjer i dag utan eit OL som mål og utan den same interessa frå media og sponsorar, hadde blitt noko heilt anna, seier Holmen.
Stig André Berge meiner prosessen har vore sunn for brytesporten.
– Mange regelendringar er gjennomført allereie, og fleire er på veg. Sporten har endra seg vesentleg og blitt lettare å forstå for "mannen i gata". No er det brytaren som er i fokus, tidlegare var det ofte dommarane. Dei har fått mindre makt, og det hjelper.
– Med desse reglane vinn den beste brytaren, ikkje den som berre er best på å forsvare seg, slik vi såg i OL i London, seier Berge.
– Presidentskifte vesentleg
Den tidlegare presidenten i det internasjonale bryteforbundet gjekk av i kjølvatnet av IOC-vedtaket i februar. Inn kom serbiske Nenad Lalovic.
– IOC-president Jacques Rogge har gått så langt som å seie at det var ein vesentleg faktor, seier Holmen.
– Den tidlegare leiinga lytta ikkje, og gjorde ikkje noko for å reformere brytinga, og fekk fleire åtvaringar. Den nye presidenten Nenad Lalovic var mykje meir dynamisk, og det er han som har fått innført alle regelendringane.
Vi er ikkje i mål med endringane, men vi er godt i gang. Derfor er det ein dobbelt gledens dag – vi har fått ein betre idrett og organisasjon, og vi er framleis med i OL, seier Tom Holmen.
– Vi har gjort feil, men vi har vedgått det og teke konsekvensane, sa Lalovic då dei presenterte den nye organiseringa før avrøystinga.
– For mi eiga karriere har det kanskje ikkje den største betydning. Men for hjartet mitt til sporten betyr det mykje, seier Stig André Berge.