– Hadde tatt med både meg og Fredrik

• Følg: Aalesund - Viking direkte

– Eg har følgt meisterskapen med argusauge, og synest det er veldig kjekt at det gjekk så bra som det gjorde. Det er kjekt å sjå eit norsk landslag hevde seg på høgt internasjonalt nivå.

– Det er ein del år sidan sist, seier Jonatan Tollås Nation.

Likevel legg ikkje den 22 år gamle AaFK-kaptein skjul på at han helst ville vore med på bronse-bragda.

– Eg var sjølvsagt veldig skuffa då eg ikkje blei tatt ut, for eg ville gjerne bidra, fortel midtstopparen til NRK.

• Les også: Nyland og Eikrem med, Tollås og Ulvestad ikkje med

– Kanskje ein fordel fysisk, men ...

Tollås Nation, som har vore AaFK-kaptein i midtstopparkollega Daniel Arnefjord sitt frå vær, har vore svært solid i årets sesong. Likevel blei både han sjølv og no 21 år gamle Fredrik Ulvestad vraka.

– Ja, det er litt rart at ingen frå AaFK var med. Hadde eg vore trenar hadde eg tatt med både meg og Fredrik Ulvestad. Men så er eg kanskje ikkje så objektiv akkurat der, flirer Tollås Nation.

Skuffelsen har lagt seg, og AaFK-spelaren gjennom snart seks år er klar på at vrakinga blir brukt til motivasjon.

– Du skal vere tilbake og inne på A-landslaget om nokre år?

– Ja, eg må jo det, det er målet. Når eg ikkje fekk vere med i U21-EM har eg desto meir lyst til å bevise kva eg kan.

Etter rundt éin månad pause frå Eliteserien trur han kanskje at den fysiske forma er betre i tillegg.

– Men det er klart at opplevinga og erfaringa spelarane fekk med seg frå Israel er uvurderleg. Eg sit ikkje igjen og seier at det var ein fordel å vere heim, humrar AaFK-midtstopparen.

Saka held fram under bildet.

Mogleg å hente Rosenborg og Godset

I Eliteserien opna Aalesund strålande, og låg ei stund heilt øvst. Etter ei litt varierande avslutning på våren der skadar prega, ligg AaFK no på femteplass med 20 poeng.

Motstandar i dag søndag er Viking – som ligg på tredjeplass med 23 poeng.

– Vi er vel ein direkte konkurrent med Viking tabellmessig, så det blir viktig med poeng mot dei, spesielt når vi er på heimebane. Vi kan ikkje la dei stikke av med poeng heim til Stavanger.

AaFK klatrar forbi Viking på målforskjell med siger. På fjerdeplass ligg Brann med 21 poeng, medan Rosenborg og Strømsgodset har fått ei lita luke i toppen.

– Det er ikkje umogleg å hente Rosenborg og Godset. Dei har 27 og 29 poeng, og vi er oppe i 23 om slår Viking.

– Men det blir sjølvsagt vanskeleg å hamle opp med dei. Det er to svært gode lage, og vi skal prestere godt om vi skal hamle opp med dei i oktober/november, meiner Tollås Nation.

– Presterte bra med så mange skader

På dei fem siste står AaFK med tre tap på bortebane, og med to heimesigrar. 22-åringen frå Ålesund er klar på korleis laget skal bli meir stabile framover.

– No har vi fått tilbake veldig mange spelarar frå skade, og får mønstre nærmast fullt mannskap igjen. Eg meiner vi presterte bra med så mange skader som vi hadde i mai.

No er Peter Orry Larsen tilbake, Demar Phillips og Tremaine Stewart er så å seie speleklare, og forsvarsbauta Daniel Arnefjord er i trening. Jason Morrison er derimot ute resten av sesongen.

– Fleire og fleire er tilbake på treningsfeltet, og konkurransen blir større. Vi har ikkje kunne stilt det absolutt beste laget så langt, noko som er synd.

– Men dei som har kome inn har gjort bra, det må nemnast, så eg skal ikkje klage for mykje, avsluttar Tollås Nation.

Aalesund sin millionspiss Abderrazak Hamdallah, eller Hamed-Allah, sonar karantene etter tre gule kort. Han er delt AaFK-toppscorar saman med Michael Barrantes.