Svendsen snytte Bjørndalen for sigeren for andre dag på rad

– Eg fekk med meg at Ole fekk problem utover i serien og stoppa opp. Då eg starta å skyte prøvde eg å ha fokus på meg sjølv, og den planen fungerte bra, seier Emil Hegle Svendsen til NRK etter sigeren.

• Resultatliste: 12,5 kilometer jaktstart

– Ikkje noko god oppleving

Før siste skyting låg det derimot an til at Ole Einar Bjørndalen ville ta sin første verdscupsiger på snart to år.

Veteranen, som blir 40 år seinare i januar, hadde skote tre fulle hus og låg 10 sekund føre Hegle Svendsen. På siste skyting gjekk det derimot ikkje som planlagt:

Bjørndalen starta godt med to treff, før det blei bom på skot tre og fire. Hegle Svendsen glei inn til siste skyting like bak 39-åringen, og klinka alle fem blinkane rett ned.

– Eg blei litt uroleg etter to skot og klarte ikkje å få alle ned. Det var ikkje noko god oppleving, fortel Bjørndalen.

Ser at «gammer'n» er i form

Hegle Svendsen fortel på si side at han òg blei uroleg undervegs på den siste ståande skytinga.

– Eg har ikkje full kontroll på skytinga, og merkar at eg skjelv litt. Men eg klarte akkurat å halde meg innanfor og eg fekk ned blinkane. Det er eg sjølvsagt dritfornøgd med, seier Hegle Svendsen.

Han bomma éin gong på første skyting, men med tre fulle hus gjekk han i einsam majestet over målstreken.

– Det var kjempedeilig, men det var eit blytungt løp. Løypa var såpass skiten og jævlig, men eg jobba bra og det lønner seg, slår 28-åringen fast.

Bjørndalen på si side heldt unna for Fourcade og glei i mål 35,6 sekund bak vinnaren.

– Han var råsterk på dei første tre seriane, og er tydelegvis i form. Eg klarte heller ikkje å ta inn så mykje i sporet. Så «gammer'n» er i form, seier ein humørfylt Hegle Svendsen.

Han snytte Bjørndalen for sigeren for andre dag på rad. I går spurta han inn til siger, 0,4 sekund framfor konkurrenten og lagkameraten.

Berre Poirée og Bjørndalen framfor

Resultatlista var prikklik resultatlista frå sprinten fredag. Då bomma både Hegle Svendsen og Bjørndalen to gonger kvar, men yngstemann av dei to var hakket vassare i sporet .

Sigeren fredag blei Emil Hegle Svendsen sin 32. verdscupsiger. Sigeren laurdag blei nummer 33.

Det gjer at Hegle Svendsen no er på delt tredjeplass i talet på flest verdscupsigrar. Han er no likt med den tyske legenda Sven Fischer. Berre Raphael Poirée (59) og Ole Einar Bjørndalen (93+1) er framfor.

I årets verdscup er Hegle Svendsen på andreplass, no 18 poeng bak Fourcade med 132 poeng. Anton Shipulin er på tredjeplass, medan Johannes Thingnes Bøe og Ole Einar Bjørndalen er på fjerde- og femteplass.

I jaktstarten laurdag enda Johannes Thingnes Bøe enda på sjetteplass, medan storebror Tarjei Bøe gjekk inn 13. plass. Henrik L'Abee-Lund kom på 29. plass, Vetle Sjåstad Christiansen nummer 36.