Åtvarar landslagsstjernene etter dette – fryktar sjukdomskrise

Du har akkurat komme i mål, kjenner adrenalinet pumpe og får kanskje lyst til å gi næraste person ein klem etter at eit tungt renn er unnagjort.

Sistnemnde vil fleire av dei norske landslagsstjernene unngå før VM-start.

– Ein prøver å tenkje på det heile tida og halde avstand til alle. I nokre situasjonar blir det mykje adrenalin og glede, og ein gløymer seg litt. Nokre glepp blir det sjølvsagt, seier Anne Kjersti Kalvå til NRK.

– Kan tenkje seg om

Langrennsløparen var ein av fire profilar som sleit med lengre tids sjukdom etter Tour de Ski i januar. Saman med lagvenninne Tiril Udnes Weng, svenske Frida Karlsson og Katharina Hennig, hamna dei på sidelinja i ein lengre periode.

No vil kvinnelandslagstrenar Sjur Ole Svarstad innføre eit slags «klemmeforbod» før VM-start. Det gjer han i frykt for smitte:

– Ein kan tenkje seg om to sekund i alle fall. Men det er vanskeleg då. Gledesscener er vanskelege å unngå. Dei er så impulsive, men eg synest dei er flinke til å ta vare på seg sjølv og andre, seier Svarstad.

– Så du kjem med ein «ikkje klemmeoppmoding»?

– Ja, eg trur vi kan roe ned på klemminga no mot VM, konstaterer han.

– Det blir lite kroppskontakt. Det blir å halde meteren, seier Kalvå om tida framover.

Svensk trenar vil tillate klemmer

I målområdet etter 10 kilometeren under Tour de Ski såg ein mellom anna Kalvå og Karlsson klemme. Like etterpå vart Kalvå koronasjuk, og Karlsson ønsket at ein skulle innføre eit klemmeforbod for å unngå smitte. I etterkant vart den svenske skiyndlingen sjølv sjuk, men ikkje av korona.

Sprintløpar Johanna Sundling har sjølv vore ute store deler av sesongen på grunn av sjukdom, og er positiv til norsk klemme-nekt:

– Det har eg tenkt på sjølv også, at det er lurt å ikkje klemme så mykje etter målgang for man veit aldri. Vi er jo veldig, veldig utsette. Det er absolutt noko eg har fundert på – å ikkje klemme så mykje.

Men svenskane har ikkje innført klemmeforbod.

– Nei, har vi klemming så er det fordi vi har bra resultat og da får vi vel ta det. Så vi har ikkje snakka så mykje om det, seier den svenske landslagstrenaren Per Nilsson som innrømmer at sjukdom har tatt meir på enn vanleg.

– Eg har prøvd å unngå det

Tiril Udnes Weng vart også sjuk etter Tour de Ski, og har før verdscuphelga i Toblach, levd i isolat heime på Lillehammer. Verdscupleiaren støttar at eit slags «klemmeforbod» er innført, men innrømmer at det er vanskeleg.

– Vi får vel klemme dei vi er nærkontaktar med, og så får det halde. Eg har prøvd å unngå det i målområdet. Ein gløymer det litt når ein har komme i mål der, og nokon kjem og vil gi deg ein klem. Det er ikkje så lett å dytte dei unna, seier Udnes Weng.

– Har du tenkt på det?

– Eg har hatt det litt i bakhovudet. Eg har sikkert klemt nokon eg òg. Eg prøver ikkje å tenkje så mykje på det, seier Udnes Weng.

Både for Udnes Weng og Kalvå er dette første verdscuphelga dei deltek i sidan Tour de Ski. Til helga blir den siste runden gått med verdscup før verdsmeisterskapen. Det skjer i italienske Toblach.

Amerikansk støtte

Den amerikanske skistjerna Jessica Diggins, som sjølv er ein klemmar, har stor forståing for tiltaka.

– Det forstår eg godt. Det er hjarteknusande å bli sjuk. Du vil jo aldri bli sjuk, for det gjer det vanskeleg å trene og konkurrere, men særleg rundt meisterskapa – som i fjor då det var så mykje stress med covid rundt OL, seier amerikanaren og fortset:

– Så eg skjønar at ein må ta forholdsreglar og vi bør ikkje dømme kvarandre for at ein prøver å halde seg friske. Kanskje vi heller bør gjere det motsette og vere stolte over at folk gjer det dei føler dei må for å kunne stille på startstreken.

Diggins sjølv vil vurdere risikoen frå løp til løp:

– Eg er ein skikkeleg klemmar, så det kjem til å krevje litt av meg å hugse på det. Eg trur eg vil ta ulik risiko, eller ingen risiko, på forskjellige stader.