«Drillo» meiner Norge har noko stort på gang

– For det første er eg veldig spent no. Eg har ein mistanke om at vi er på gang mot noko litt større igjen, seier Egil Olsen til NRK.

76-åringen var norsk landslagssjef i perioden frå 1990-1998 og 2009–2013. Og tok Norge til to VM-sluttspel i dei elleville 90-åra for norsk landslagsfotball.

– Sterk siger mot Albania

Etter to oppløftande privatkampar Australia (4–1) og Albania (0–1) i mars kveikte ein gneiste av entusiasme hos Egil Olsen.

– Det går både på resultata i dei to siste kampane. Men ikkje minst på grunn av dei spennande spelarane vi har no, og som er på veg fram, seier Drillo vidare til NRK.

Spesielt sigeren borte mot Albania blei han imponert over. Etter 16 månader i sjefsstolen har Lars Lagerbäck innprenta filosofien sin inn i laget, meiner Drillo.

No ventar to nye privatkampar for Lagerbäcks nye Norge. Først Island på laurdag, og deretter Panama onsdag i neste veke.

– Det ser lyst ut. Eg er veldig spent på dei to kampane, og om dei klarar å følgje opp. Ikkje minst den kampen mot Albania var sterk, seier Egil Olsen til NRK.

– Kor avgjerande er desse to kampane, kva svar håpar du å sjå?

– At det som Lars står for byrjar å fungere. Han har ein veldig klar og tydeleg fotballfilosofi, og dette er dei to siste treningskampane vi kjem til å spele på veldig lenge, seier Drillo, om oppgjera som er dei siste før National League til hausten.

– Nøkterne

Der møter Norge Kypros, Bulgaria og Slovenia og vinnaren av gruppa spelar «play-off» til EM i 2020. Deretter startar den ordinære EM-kvaliken våren 2019.

Norges landslagsskaptein Stefan Johansen meiner Egil Olsen er ein mann ein skal lytte til.

– Han veit jo kva han pratar om. Men det er opp til oss å vise det. De to siste kampane var veldig bra frå vår side. Men jobben er langt ifrå gjort. Det har vore litt for mykje «opp og ned» på prestasjonar. No må vi stabilisere oss inn mot Nations League, og så skal vi bite godt ifrå oss der, seier Fulham-proffen som er klar for Premier League neste sesong.

Toppfotballsjef Nils Johan Semb vil derimot dempe forventingane før den viktige EM-hausten.

– Det er hyggeleg og veldig positivt at Egil seier det. Men det er framleis spelt berre to kampar. I tillegg var Nord-Irland i den avsluttande VM-kvalikkampen positiv (1-0-siger). Det er ting på gang, og vi er nøkterne optimistar. Men det skal spelast mange kampar før ting får satt seg hundre prosent, meiner Nils Johan Semb.