21 år gamal bråstoppa Kjetil Jansruds sterke utvikling som alpinttalent. Då fekk den ferske europacupvinnaren sin mykje omtala prolaps i ryggen.
– Eg starta å lure på om dette var slutten på karrieren, seier pappa Jan Jansrud.
Då tenkte pappa Jan Jansrud at sonen like greit kunne sikre framtida på andre måtar, som innebar å droppe tett oppfølging av landslaget og Olympiatoppen.
– Eg var engsteleg og litt irritert over skadesituasjonen. Då foreslo eg at han kunne flytte til USA, ta ei god utdanning og stå på ski der, seier pappa Jan Jansrud.
Bestemt
Jan hadde trena Kjetil frå barndommen og ført opp alle treningstimar, som no ligg loggført i permar heime på Vinstra.
På det meste gjekk det med 20 timar i veka til knallhardt arbeid.
– Medan andre familiar reiste på haustferie prioriterte vi trening, seier Jan.
I dag er far glad for at sonen blei heime i Norge då forslaget om utdanning kom på bordet.
– Det ville blitt å gå for eit dårlegare opplegg enn det han har fått her heime. Han hadde nok ikkje tatt seg til toppen då. Det hadde nok blitt andre ting å tenke på, seier Jan Jansrud.
– Forslaget blei for øvrig blankt avvist. Han var veldig bestemt der, seier pappa Jansrud.
– Her i Norge har han vore del av eit sterkt lag heile vegen og fått mykje drahjelp av Aksel Lund Svindal. Først som storslalåmkøyrar, så som fartskøyrar, seier NRKs alpintkommentator Marius Arnesen.
– Hadde han valgt annleis hadde han nok ikkje vunne Kitzbühel-utforen, fortel Arnesen.
Med vond rygg heldt Kjetil fram. Etter kvart kom han tilbake og fekk både fart og teknikk til å stemme i bakken, men skaden måtte han stadig kjenne på. Som då NRK seks år seinare blei med alpintstjerna til fysioteraputen.
Då var smertene sterke i kvart einaste renn og OL-sølvvinnaren frå 2010 var avhengig av daglege behandlingar etter kvar eniaste konkurranse.
Aamodt: – Ein «stayer» utanom det vanlege
Kitzbübel 24. januar 2015: Kjetil Jansrud blir hylla av eit tital tusen fans i bånn av verdas tøffaste utforløype. Bak seg har han OL-gull og den gjevaste prisen frå idrettsgallaen. Alt har skjedd på mindre enn eitt år.
– Han er ein «stayer» utanom det vanlege, seier tidlegare OL- og VM-vinnar i alpint Kjetil André Aamodt.
Det kan mannen som kjenner Kjetils rygg like godt som sin eigen skrive under på.
– Det vore ein tung veg tilbake til der han er i dag. Det er ein stor prestasjon. Dette er ei skade som vil følge han resten av livet, seier landslagets fysiske trenar, Lars Mæland.
Mæland jobbar kontinuerleg med Jansrud for å halde ryggen i sjakk.
– Han er mentalt sterk som har lært seg å leve med plagene. Når du skal køyre Super-G og utfor må du vere offensiv og uhyre fokusert på løypa. Han er tøff i hovudet sidan han ikkje lar seg påverke når han har vondt i ryggen, seier Mæland.
I tillegg er det verd å nemne at Kitzbühel-vinnaren kjempa seg tilbake frå korsbandskade så seint som i 2013.
VIDEO: Se Jansrud vinnerløp i Kitzbühel
Trur Jansrud kan hevde seg i slalåm og storslalåm igjen
Så korleis kunne 29-åringens karriere sett ut om han ikkje hadde fått den skaden til det tidspunktet?
– Han hadde definitivt hatt fleire triumfar i slalåm og storslalåm, seier Aamodt.
– Men det betyr ikkje så mykje no. Kjetil kan køyre i ti år til og kjem til å ha mange fleire triumfar under beltet før han legg opp, seier Aamodt, som spår Jansrud på pallen i utfor og Super-G under VM.
Pappa Jansrud trur sonen også kan hevde seg i slalåm og storslalåm igjen.
– Du skal ikkje sjå bort frå det dersom han får godt grep om ryggen. Han ser bedre ut i slalåmbakken enn på lenge, seier Jan Jansrud.
Laurdag jubla han vilt framfor TV-skjermen då sonens Kitzbühel-triumf var i boks.
No kan han vere stolt over at sonen blei legendarisk i verdas tøffaste utforløype og ikkje tok utdanning i USA.
– Det har vore ein lang veg til der han er i dag. Det som har skjedd er ein draum, rett og slett.
– Så til andre foreldre flest vil eg bare seie at dei heile vegen må stole på at barna deira kan bli gode, sjølv om ikkje alle fysiske føresetnader er på plass.
– Men det krev hardt arbeid. Det er ikkje bare slik at ein kan toge til OL-gull eller triumf i Kitzbühel, seier alpintpappaen, som feira gårsdagen med vin og reker.