– Revansj betyr alt for oss

– Vi skuldar Frankrike ein, seier Irlands midtbanespelar, Wes Hoolahan til ESPN.

Den eine han snakkar om skjedde i ein kamp mellom laga for nesten sju år sidan.

18. november, 2009, Paris: Frankrike tar imot Irland til kamp to i playoff til VM i Sør-Afrika den kommande sommaren. Irland leda 1–0 etter 90 minutt, men sidan Frankrike vann med same siffer i Dublin nokre dagar i førevegen gjekk kampen til ekstra omgangar. I første ekstra omgang kom scoringa som skulle sende Frankrike til VM, medan Irland måtte sjå meisterskapen frå sofaen.

I forkant av scoringa brukte Thierry Henry handa for å leggje ballen til rette for seg sjølv, og framfor mål fann han William Gallas som stonga inn scoringa som avgjorde kampen.

• Les også: Henry jukset Frankrike til VM
• Les også: Scheie lå søvnløs etter Henry-juks

Hugsar det godt

I «fanzone» i Lyon er det god stemning mellom dei tilreisande frå Irland og supporterane til vertsnasjonen Frankrike.

Men handsen til Henry har dei ikkje gløymd.

– Revansj betyr alt for oss. Vi må slå Frankrike, seier ein irsk supporter, til rungande jubel frå kameratane som er samla rundt han.

– Vi har ikkje gløymd det. Det var utruleg vondt, seier gjengen samstemt.

For handsen såg alle, med unntak av den svenske dommaren Martin Hansson.

• Les også: Her sender Brady Irland til himmels

– Hjartet seier Irland, fornufta seier Frankrike

Irane har sett sitt preg på Frankrike under EM, med sitt engasjement og songar i gatene. For første gong skal dei no spele i utslagsrundane i eit EM.

– Hjartet mitt seier 1–0 til Irland, men fornufta seier 2–1 til Frankrike, seier ein irske supporter til NRK.

I forkant av kampen har det blitt snakka mykje om Henrys hands for nesten sju år sida, men NRKs fotballekspert, Lise Klaveness trur ikkje det kjem til å påverka spelarane.

– Spelarane tenker nok ikkje på det, men supporterane vil nok gjera det, seier ho.