– Privatlandskampane har utspela si rolle

Berre drygt 7000 møtte fram til kampen mot Kviterussland på Ullevaal i går. Det enda med 0-1 og ein innsats som gav pipekonsert.

Det er heller ikkje første gongen Norge ikkje har levert når dei har spela privatkamp. Slett ikkje.

Med nokre få heiderlege unntak – mot Island og Belgia i sommar – har privatlandskampar i lang tid vore sørgjelege greier.

2-0 over Finland i mars i år var ikkje noko fyverkeri det heller. Men det var iallfall mål og siger, og dermed langt betre enn dei føregåande kampane. Tre gonger på rad hadde laget gått av bana utan mål på heimebane. Det hadde gått over 500 speleminutt sidan siste scoring, og 804 dagar sidan siste siger.

Norge har under Per-Mathias Høgmos leiing spela 17 treningskampar. Berre tre av desse har gitt siger, og over halvparten av dei har enda med tap (sjå faktaboks).

Triste privatlandskampar

Her er fire grunnar til at publikum ikkje lenger møter fram til privatlandskampar på Ullevaal i særleg grad:

• 29. mars 2016: Norge – Finland 2–0. Etter fleire kampar utan mål i privatlandskampar, losna det mot Finland. Men utover scoringane til Jo Inge Berget og Stefan Johansen var det lite å gle seg over. På tribunane sat berre 4675 tilskodarar. Fem dagar tidlegare hadde Norge møtt Estland borte. Resultatet? 0-0
• 8. juni 2015: Norge – Sverige 0–0. Dette skulle vere oppkøyring til EM-kvaliken mot Aserbajdsjan fire dagar seinare. Norge spela trøysteslaust før pause, og vesentleg betre etterpå i kampen som var mest profilert som duellen mellom Ødegaard og Zlatan. Og mot Aserbajdsjan blei det også 0–0.
• 12. november 2014: Norge – Estland 0–1. Denne kampen var også oppkøyring til kvalik-kamp mot Aserbajdsjan. Keeper Ørjan Håskjold Nyland bomma og let Estland score i første omgang. Verken før eller etterpå makta Norge å skape særleg mykje. Men i Aserbajdsjan fire dagar seinare vann faktisk Norge 1–0.
• 27. august 2014: Norge – Foreinte Arabiske Emirat 0–0. Denne kampen gjekk i Stavanger, og manglande resultat og underhaldning ute på bana vart fullstendig overskygga av at det var første gongen Martin Ødegaard starta. Men siger og mål vart det uansett ikkje der heller.

– Unødvendig vonde

Fotballkommentator Lars Tjærnås meiner at det ikkje er vits i å spele meir enn maks eit par privatlandskampar i året.

– Dersom vi først skal spele privatlandskampar, må vi gjere det skikkeleg. Ikkje giddelaust og trøytt og svakt som i går, seier Lars Tjærnås. – Det svekkjer merkevara Norges fotballandslag.

Han meiner privatlandskampar på mange måtar har utspela si rolle.

– Spelarane ser ofte på kampane som eit unødvendig vonde. Publikum kan sjå toppfotball på tv kvar dag, og blir ikkje freista dersom vi ikkje møter topplag, seier Tjærnås.

– Fasit etter Tyskland-kampen

NRKs ekspert Lise Klaveness vil vente til etter Tyskland-kampen for å slå fast om førestillinga mot Kviterussland har negative konsekvensar.

– Fasiten på kva kampen mot Kviterussland i ettertid betyr, vil vi ikkje få før etter Tyskland-kampen søndag, seier NRKs Lise Klaveness.

Og utdjupar:

– Om Norge gjer ein god kamp mot Tyskland, betyr kampen i går ingenting. Då vil folk knapt nok hugse den. Men dersom Norge blir knust eller leverer ein dårleg kamp, blir det negative inntrykket av Kviterussland-kampen truleg forsterka, meiner Klaveness.

– Dersom tendensen med svake og innsatslause privatkampar held seg over lang tid, kan det gi negativitet som kan setje seg i laget og ha effekt også inn i dei teljande kampane.

– Men dessverre er ikkje Norge i posisjon til å kunne velje blant dei mest attraktive motstandarane, seier Klaveness.