– Det såg jo heilt forferdeleg ut. Eg frykta med ein gong at heile sesongen skulle ryke.
Håvard Holmefjord Lorentzen var nesten ferdig med ein av sine siste treningsdagar i sesongoppkøyringa. Skøytetalentet med tre gull frå junior-VM har hatt ei god oppkøyring og hadde sett seg mål om å ta sin fyrste pallplass i verdscupen til vinteren.
Men så glapp skøyta på isen i Inzell.
Håpar å trene om ein månad
– Me hadde ein treningsøkt der me går litt raske rundar. Når eg går inn i svingen og setter ned venstreskøyta har eg all tyngda og vekta på den, plutseleg berre glipper skøyta under meg.
– Eg får ei veldig dum retning inn mot putene og klarer ikkje å få snudd meg rundt og ta beina opp i veret. Da treffer eg inn med skøytene fyrst og det neste eg ser er at eg har eit vanvittig kutt på høgrefoten, fortel Lorentzen.
Dei fyrste tankane om at sesongen var over ser heldigvis ikkje ut til å stemme. Bergensaren kan vere tilbake i trening alt om ein månads tid.
– Heldigvis var det ingen sener som var skore over. Forhåpentlegvis kan eg begynne å trene lett om ein månads tid. Eg må berre ta tida til hjelp, men eg må nok sette meg nye mål for vinteren nå, seier Lorentzen.
– Forferdeleg syn
Nå ligger 23-åringen på sjukehus i Traunstein 20 minutt unna skøytebyen Inzell. Der vil han vere over helga for å få behandling for det forferdelege kuttet i høgreleggen.
– Skøyta starta langt oppå leggen og skar nesten som ein ostehøvel nedover leggen og laga ein 15 centimeter lang flenge. Det var ikkje eit fint syn å sjå der eg låg på isen, fortel han.