Suzann Pettersen kom i konflikt med ein av dei under Solheim Cup i helga (sjå faktaramme). Amerikanske Allison Lee tok ballen etter ein mislukka putt fordi ho trudde at Europa hadde godtatt det. Men Pettersen protesterte.
Dei fleste idrettar har i større eller mindre grad av uskrivne reglar. Eller gentlemen's agreements, som det heiter – også blant kvinnene.
Her er ei liste, utarbeidd av Professional Golfers Association (PGA). Som det sømmer seg i denne idretten, er lista på 18 punkt.
1. Ver stille. Golf er ein sosial idrett, men det er også ein idrett med konsentrasjon. Ikkje snakk når nokon skal slå. Di røyst er ein distraksjon – og ei grei unnskyldning dersom slaget ikkje er godt.
2. Forlat bana slik ho var då du kom – eller betre. Reparer merke i bunkeren, eller legg torva tilbake på plass. Landar ballen i eit gammalt fotavtrykk i bunkeren, gjer det oppgåva vanskelegare. Ute på graset er det heller ikkje populært med merke.
3. Pass på skuggen din. Ikkje la skuggen kome inn der spelaren skal slå, eller bevege den i hans synsfelt.
4. Pass på kvar du står. Det er distraherande for han om du står direkte bak spelarens slaglinje eller puttelinje. Vil du sjå putten eller dra lærdom av spelaren, så vent med å gå bak han til han har slått. Uansett må du ikkje stå for nær han.
5. Sportsånd framfor alt. Trur du at du kan tene på å «miste» ein bag eller hoste medan motspelaren konsentrerer seg om putten? Neppe. Det einaste du truleg oppnår er at ingen vil gå saman med deg på framtidige rundar.
6. Hald flagget for konkurrenten. Det er aldri feil å spørje nokon som skal ta ein lang putt om du skal halde flagget for dei. Hald flagget i holet til spelaren har sendt av garde putten, så fjernar du flagget før ballen er framme. Og om nokon er rett på utsida av greenen, spør om vedkomande ønskjer at du skal halde flagget i holet eller ikkje.
7. Tryggleik først. Ikkje nøl med å rope «fore» når du har slått. Dette er eit varsel om kva veg ballen kjem. Dersom du sender i veg ein ball i retning ein person, så rop «fore» så høgt du kan.
8. Ver raus med tips. Caddiane, drikkekøyrarane, og andre hjelparar er ikkje der for moro skuld. Dei er på jobb og blir forventa å gjere jobben profesjonelt. Derfor skal du også behandle dei på ein profesjonell måte når dei gjer ein god jobb.
9. Returner mista køller. Spelarar gløymer ofte golfkøllene sine. Ikkje knabb den, men lever den tilbake. Du kjem sjølv til å gløyme di ein vakker dag. Dette burde vere unødvendig å seie, dessverre er det ikkje det.
10. Hald følgje med gruppa framfor deg. Det er lett å bli irritert over folk som spelar for sakte. Ha gruppa framfor deg innan synsvidde.
11. La raskare spelarar spele forbi deg. Dei vil setje pris på det, og det vil du også. Det er ikkje moro for dei å sjå deg kløne med holet ditt. Det er heller ikkje moro for deg å ha dei pustande i nakken. Og er du den som spelar raskt og skal forbi, spel ekstra raskt til du er forbi. Ikkje leit etter bortkomne ballar for lenge, eller bruk lang tid på å måle opp ein putt.
12. Ikkje le når nokon bommar på ein kort putt. Det er ikkje moro for dei, og det er ikkje moro for deg når dei ler etter at du har gjort det same på eit seinare hol. Som du garantert kjem til å gjere.
13. Vis respekt for spelet og spelarane. Ha det moro, men ikkje på andres kostnad. Roping så det kan høyrast mange fairwayar unna, er ikkje morosamt. Ikkje bann så det ljomar heller. Ikkje kast kølla i bakken av sinne heller. Ta andre spelarar i handa etter runden, gjerne samstundes som du tar av deg lua. Og ikkje ha lua på innandørs.
14. Spel til ballen er i holet. Om ikkje din med- eller motspelar spesifikt seier at ballen er «god», det vil seie aksepterer at du har vunne holet etter ein litt mislykka putt, spel til ballen er nede i koppen. Holet er ikkje over før ballen er der.
15. Golfbil-etikette. Parker på ein stad der du ikkje treng å gå tilbake for å hente han. Ikkje parker slik at bilen står i vegen for andre spelarar. Ikkje start bilen medan ein annan spelar er i ferd med å slå. Ikkje start bilen i det medpassasjeren er i ferd med å ta ein slurk av vassflaska – spesielt ikkje om han er kledd i kvitt.
16. Kom i hug då du var nybyrjar. Ikkje ver ekkel mot dei som er ferske i dette spelet, eller ikkje heilt har fått med seg normene. Prøv heller å lære dei det.
17. Ikkje ver ein sandbagger. Når du er i konkurranse, anten turnering eller berre ei vennskapeleg dyst – ikkje fall for freistinga til å skrive høgare handikap enn du skal ha. Det er juks, og det er det verste du kan gjer ei golf. Det er utilgjeveleg.
18. Vinnaren kjøper drinkane etter konkurransen. Om du har vunne runden og pengepremien, er det minste du kan gjere å spandere ein runde på alle i klubbhuset etterpå.
PS: Det var regel nummer 14 Suzann Pettersen påpeika at Allison Lee hadde brote under Solheim Cup denne helga – ei påpeiking som skapte overskrifter og fy-rop verda over.