NRKs sjakkekspert Torstein Bae er mektig imponert.
– Det er ei utruleg rekke som ingen andre kan vise til noko i nærleiken av, seier Bae.
– Gjennom eitt og eit halvt år har han gått gjennom turnering etter turnering, kamp etter kamp, mot verdseliten. Han er stadig utan tap. Det er ein fenomenal prestasjon av vår meister, seier Bae.
Det er 532 dagar sidan Magnus Carlsen tapte sin siste langsjakk-kamp. Det var mot Shakhriyar Mamedjarov 31. juli 2018.
Den gamle rekorden tilhøyrde russisk-nederlandske Sergej Tiviakov og blei sett i 2005.
– Men han møtte ofte dårleg motstand i løpet av si sigersrekkje. Carlsen har møtt god motstand heile tida, seier Bae.
Steg på vegen mot å bli tidenes største
Carlsen ligg eit stykke bak teten i turneringa i Nederland, og han hadde også startvanskar i kampen tysdag. Med svart sleit han, men sikra remis etter 45 trekk.
Men rekorden er god nok uansett.
– Mange trur at dette er ein rekord som kan bli ståande i tiår framover. Vi veit ikkje kor mange fleire Magnus kan klare, no jaktar han vidare på endå fleire, seier Bae.
Han meiner rekorden er endå eit steg på Carlsens veg mot å bli den største sjakkspelaren gjennom alle tider.
– Det som kanskje er aller mest imponerande, er at han på ingen måte har spela forsiktig. Tvert imot har han spela mykje meir aggressivt enn han gjorde for nokre år sidan. Likevel har han altså greidd dette, seier Bae.
– Utruleg prestasjon
– Kor mykje tenkjer Carlsen på dette sjølv?
– Eg meiner han har sagt sjølv at dette er noko han har hatt i bakhovudet, fordi han ser at dette er ein heilt utruleg prestasjon. Han har vore nær ved å tape nokre gonger i desse 111 partia, men har greidd å bite tennene saman, hatt litt gli også av og til, men han har klart det.
Carlsen er mange gonger verdsmeister i langsjakk, hurtigsjakk og lynsjakk. No har han også sette ei historisk rekke som ingen andre meistrar kan matche.
– Er ein slik prestasjon noko som fortener tittelen årets namn på neste idrettsgalla?
– Eg vil absolutt seie at dette må vere eitt av elementa der.
NB: Carlsen sjølv reknar med berre 109 parti. Han tek ikkje med to kampar han har spela for sin klubb Offerspill mot norsk motstand.
Internasjonalt er det også sett spørsmål ved Tiviakovs rekord, fordi fleire av kampane hans var mot spelarar på eit lågt nivå. Derfor var det mange som tilkjende Carlsen rekord då han i oktober spela sitt parti nummer 101 utan tap, og slo Ding Lirens 100 parti.