Under utfortreninga i dag fekk han nest beste tid, over eitt sekund bak Christof Innerhofer. Men Aksel Lund Svindal droppa ein port. Hadde han ikkje gjort det, hadde nok differansen blitt dobla.
Defensiv Aksel Lund Svindal
NRK møtte ein defensiv Aksel Lund Svindal rett etter målgang i dag. Dei vanskeleg forholda kom overraskande på Svindal, og han ser mørkt på den store avstanden opp til Innerhofer.
– Eg fryktar ikkje løypa. Men eg fryktar at eg ikkje får køyrd like fort som Innerhofer. Eg droppa ein port og ligg likevel eit sekund bak Innerhofer.
– Eg har aldri høyrt deg så defensiv før?
– Eg likar ikkje å vere defensiv. Eg liker ikkje heilt at du seier det, for å vere ærleg. Men det er vanskeleg å stå her og late som, og å lure meg sjølv. Men hadde eg hatt eit forsøk til i dag, så hadde eg framleis ikkje klart å ta igjen Innerhofer.
– Berre Innerhofer som taklar dette
Aksel Lund Svindal seier at det ikkje er sjølve løypetraséen som er vanskeleg. Det er rett og slett det beinharde, humpete og isete underlaget. Han har aldri køyrd ei så vanskeleg løype som dette, og trur løypa favoriserer Innerhofer.
– Dette er den tøffaste utforløypa eg har køyrd nokon gong. Det var ekstremt vanskeleg. Det slår noko sinnsjukt. Det er ein mann som taklar denne løypa slik det ser ut no, og det er Innerhofer, seier Aksel Lund Svindal.
– Blei tatt på senga
Det norske teamet har sjølvsagt studert løypa på førehand. Men det var eit heilt anna syn som møtte Aksel Lund Svindal då han skulle setje utfor under treninga. Det som først såg overkomeleg ut var rett og slett blitt ekstremt vanskeleg.
– Eg er overraska over at det skal vere så ekstremt. Då vi studerte løypa såg det overkomeleg ut. Det skulle gå an å angripe og å få med seg fart heile vegen. Men når vi kjem hit blir vi tekne på senga.
– Heldigvis var ikkje farta så høg
Farta under dagens utfortrening låg på omlag 110/120 kilometer i timen. Det berga på mange måtar Aksel Lund Svindal. Hadde farta kome opp i rundt 130 kilometer i timen, ville det bli omtrent umogleg å køyre og angripe aktivt, seier han.
– Dette er det tøffaste eg har køyrd. Heldigvis var ikkje farta så høg. Men når du ikkje har snøkontakt er det ikkje så mykje du kan gjere. Det ristar så fælt at du liksom ikkje har kontakt med underlaget.