– Det vi har erfart er at reinen står veldig mykje berre i eit sentralt heiområde, seier viltforvaltar hos fylkesmannen i Vest-Agder, Tor Punsvik til NRK.no.
Setesdal - Ryfylke er norges nest største og Europas sørlegaste villreinområde.
Menneskelege inngrep i naturen er truleg ei av årsakene til at reinen har avgrensa bruksområde sitt i Setesdal.
– Det er norges kraftbatteri nummer ein. Det er svære kraftmagasin som bidreg til å setje store beiteområde under vatn. I tillegg gjer dette det vanskeleg å ferdast der reinen tradisjonelt har vore, seier Punsvik.
Vil auke bestanden
Mellom 2006 og 2010 vart det gjennomført eit stort villreinprosjekt i området. Her lærte ein mykje om rørslemønsteret til reinen.
I det nye prosjektet som skal gå mellom 2013 og 2017 vil ein sjå på korleis ein kan auke bestanden og få reinen til å bruke eit større område.
– For første gang i villreinforskingshistoria ynskjer vi å prøve å sjå om det er slik at ein kraftig auke i reinstammen sør-området vil bidra til at dyra vert pressa aktivt ut i randområda, seier Punsvik.
Håpet er at dagens bestand på 2000 villrein skal aukast betrakteleg, og kanskje doblast.
I oppstartsåret er det sett av 1,6 millionar kroner til forskingsprosjektet.
GPS-merking
I eit skriv frå miljøvernavdelinga i Vest-Agder vert det peika på fleire tiltak for å få reinen til å nytte større beiteområde. Blant anna å sommarstenge anleggsvegar. I tillegg kan det blir aktuelt med å etablere jaktfrie soner.
Fleire av dyra skal også GPS-merkast. Til dette er det sett av 900 000 kroner i 2013.
Olav Strand er villreinforskar hos norsk institutt for naturforsking. Han meiner dette er eit viktig prosjekt.
– Dette er villreinområdet i Norge som er mest påverka av storsamfunnet sine naturinngrep, seier han til NRK.no.
– Eit av hovudmåla er å få reinen tilbake til dei tradisjonelle områda dei brukte før, seier han.
– Unikt prosjekt
Viltforvaltar Tor Punsvik meiner prosjektet er unikt i Norge. Bakgrunnen er at ei rekkje aktørar er involvert og skal samarbeide.
Til saman 13 kommunar i Rogaland, Vest-Agder og Aust-Agder bidreg økonomisk. Både Rogaland, Vest-Agder og Aust-Agder fylkeskommunar er med, saman med blant andre vegvesenet og viltreinnemnda.
– Det er heilt unikt i og med at vi har ei så stor breidde i deltakinga. Det betyr eit breidt eigarskap i kunnskapen som kjem ut, seier Punsvik.