Førebels vil ikkje politiet seie noko om brannårsaka.
Samstundes stadfestar politiet at krimteknikarane har skrive ein rapport etter undersøkingane.
– Eg har ikkje fått snakka detaljert med åstadsgranskarane som var der. Vi må komme tilbake til dette, seier lensmann i Lillesand, Kjetil Nygaard til NRK.
Fleire fagfolk har undersøkt åstaden måndag. Dei skal tysdag gå gjennom sine funn og opplysningar for å sjå om dei kjem ut med same konklusjon. Først etter det vil politiet offentleggjere brannårsaka.
- Les også: Kjenner ikkje årsak til dødsbrannen
Kvinne (38) omkom
Vakthavande jurist i Agder-politiet stadfestar overfor NRK at krimteknikarane har konkludert, men vil førebels ikkje seie om dei veit kva som starta brannen.
Brannvesenet fekk melding om brannen ved 8-tida laurdag morgon. Tre kvarter seinare stadfesta politiet at ei 38 år gammal kvinne var omkomme.
Ein mann (51) vart i tillegg send til sjukehuset i Kristiansand. Ifølgje politiet skal mannen ha hoppa ut av eit vindauge for å komme seg ut av leilegheita som stod i brann.
Naboar varsla om brannen
Naboar skal ha høyrt glas knuse då han hoppa ut, og varsla ifrå om brannen.
Mannen er no utskriven frå sjukehus. Han har forklart i avhøyr at han vakna av varme og røyk.
Det er gjort fleire vitneavhøyr i samband med brannen. Men ifølgje lensmannen har det ikkje komme fram nye opplysningar, som kan seie noko om brannårsaka, i desse avhøyra.
