Vil fjerne fem årsverk på barneavdelinga

Laurdag fortalde NRK at ei arbeidsgruppe i Sørlandet sjukehus vil redusere talet på sengeplassar på barneavdelingane i Kristiansand og Arendal.

Etter det NRK veit er leiargruppa ved barneavdelinga ikkje einige om prosjektgruppas konklusjon om nedlegging av sengeplassar.

Sjukehuset behandlar fleire pasientar poliklinisk, og klinikkleiinga meiner sjukehuset har fleire sengeplassar på barneavdelingane enn det er behov for.

Minimum fem stillingar

I eit brev til avdelingsleiaren på barneavdelinga går det fram at klinikksjefen vil kutte minimum fem årsverk på barneavdelingane når talet på sengeplassar kuttast.

Klinikksjef Nina Hope Iversen seier dette er ein konsekvens av at dei skal kutte fem døgnplassar.

– Vi tek ned årsverk fordi vi over tid har fått ein reduksjon i talet på liggedøgn i barne- og ungdomsavdelinga. Som ein konsekvens av lågt belegg på sengepostane følgjer nedbemanning med, seier Hope Iversen til NRK.

Klinikksjefen har gitt barneavdelinga ein frist til mars med å lage ein plan for nedbemanning.

– Vi landar nok på ein konklusjon i løpet av våren ein gong, seier ho.

– Kan det bli oppseiingar?

– Det er veldig vanskeleg å garantere på førehand. Det kjem an på kva stillingar og funksjonar avdelinga som jobbar med dette definerer som aktuelle for reduksjon. Erfaring frå tidlegare prosessar har vore at vi i stor grad finn alternativt arbeid til kompetent personell, seier ho.

– Ikkje ei strukturendring

Natasha Pedersen i «Ja til lindrande enhet og omsorg for barn», sa til NRK i helga at ho er sterkt kritisk til å legge ned fem sengeplassar.

Ho drog også fram helseminister Bent Høie sitt besøk i landsdelen. Der sa han at sjukehuset må vente med strukturelle endringar til ein nasjonal helseplan er klar.

Klinikksjefen meiner at dette ikkje dreiar seg om ei strukturendring.

– Dette er ei rein driftstilpasning i forhold til aktiviteten i avdelinga og har ingen konsekvensar for organiseringa av barne- og ungdomsavdelinga, seier ho.

Det er førebels ikkje klart om stillingane skal kuttast i Kristiansand eller Arendal, eller begge stader.