Vil finne ut kvifor elgkalvar døyr – ber lokale om hjelp

– Dei siste åra er det funne døde elgkalvar og på hausten har det vore mange friske elgkyr utan kalv. Det er jo litt merkeleg, så det er noko vi har lurt veldig på.

Det seier leiar av Viltnemda i Froland kommune Øyvind Froland.

Han fortel at dei no har sett i gang eit prosjekt for å prøve å finne ut kva som har ramma elgkalvane.

Dei har ingen ytre, synlege skadar melder Tvedestrandsposten, som først skreiv om saka.

Kan komme av flått

Froland har ein teori om kva kalvane kan ha døydd av.

– Dei kan ha vorte infiserte av ein sjukdom som kan vere påført av hjortelusfluge eller flått, seier han.

– Kvifor trur de at flåtten kan ha noko med dette å gjere?

– Det kan vere anaplasma, som er ein bakterie flåtten tek med seg. Den fører til lungebetennelse og nedsett allmenntilstand og til slutt død.

Han legg til at undersøkingar som er gjorde sporadisk til no, kan tyde på at kalvane har hatt lungebetennelse.

Treng tips

Froland fortel at det førebels er teke få prøver av døde kalvar, men at det er noko dei vil jobbe vidare med no.

Då treng dei å få undersøkt fleire døde kalvar.

– Vi vil gjerne få inn så mange døde elgkalvar av året som mogleg, seier Froland.

Viltnemnda har bede lokalbefolkninga om å gi beskjed om dei kjem over døde elgkalvar i naturen.

– Det er veldig vanskeleg å finne ein elgkalv og ein skal ha litt flaks for å finne dei. Vi treng alle auge som ser.

Froland fortel at dei vil ta prøver av milt og lunger for å prøve å finne ut kva kalvane kan vere infisert med.

Gjeld fleire stader

Ifølgje Froland i Viltnemnda er dette ikkje berre eit lokalt fenomen.

Han seier gjeld det gjeld heile Agder og deler av Telemark.