NRK Meny
Normal

Valsa over Byåsen føre rekordpublikum

(VIPERS KRISTIANSAND - BYÅSEN 31-23): Vipers Kristiansand har fått ein knallstart på 2015 med to strake sigrar. Onsdag kontrollerte dei inn til siger mot Byåsen.

Vipers

Annette Jensen spelte ein god kamp for Vipers Kristiansand.

Foto: Sander Heggheim / NRK

Sørlendingane var det beste laget frå start til mål heime i Aquarama. Thorey Rosa Stefansdottir sette standarden og scora dei tre første Vipers-måla.

Keeper Sakura Hauge tok fram sitt ypparste og varta opp med fleire klasseredningar. Til pause leia Vipers 17-14 over den «gamle» stormakta frå Trondheim.

Evje-magi

I andre omgang var Byåsen i ferd med å ta inn forspranget til Vipers. Men Vipers-jentene tok seg saman.

12 minutt ut i omgangen storma Evje-jenta Tonje Refsnes gjennom Byåsen-forsvaret og sende Vipers opp i 24-19.

Åtte minutt før slutt kontra Refsnes inn 30-22, og sette i realiteten spikeren i kista. Byåsen var aldri i nærleiken av å tukte Vipers.

Nesten fulle tribuner

1672 tilskodarar så oppgjeret i Aquarama. Det er tilskodarrekord for sesongen. Det er kun Byåsen som har eit høgare tilskodarsnitt enn Vipers Kristiansand.

Sigeren betyr at Vipers Kristiansand er med i kampen om medalje i årets eliteserie.