Det var i april i fjor at presten hevda han vart utsett for trugslar, då han fann ein kniv køyrt gjennom eit bilete av seg sjølv i bilen sin. Han var særs uroa etter episoden.
– Eg er jo berre eit menneske eg også, og det er klart at dette går inn på meg. Familien er også uroa. Vi blir jo redde, det er klart det, sa han til NRK.
Ny trugsel
Dagen etter møtte fleire hundre menneske opp i den vesle bygda, for å vise si støtte til den truga presten. Ordførar Bjørgulv Sverdrup Lund sa at bygda held saman og var særs oppteken av å finne ut kven som stod bak trugslane.
I juni hevda presten at han igjen vart utsett for trugsel. Bremseslangar på bilen hans var kutta av slik at han enda i grøfta. I tillegg skal han ha motteke eit trugselbrev i posten, dynka i parafin.
Tiltalt
I juli vart presten kalla inn til avhøyr. Han var no mistenkt for falsk forklaring.
– Bakgrunnen for mistanken er avvik i forklaringa rundt fysiske funn, samt tekniske spor. Politiet har førebels ikkje fått svar på alle analyser og presten vert no avhøyrt av politiet i Kristiansand, sa politiførstebetjent Dag Hovden.
Valle-presten har heile tida hevda at han er uskuldig i saka.
I september vart presten tiltalt for falske trugslar mot seg sjølv, då statsadvokaten tok ut tiltale.
I dag forklarar han seg i kommunstyresalen i Valle. NRK følgjer saka direkte på nett.