NRK Meny
Normal

Utelukkar andre norske klubbar

ØIF Arendal-keeper Svenn Erik Medhus seier at det er uaktuelt å spele for ein annan norsk klubb.

Svenn Erik Medhus

Svenn Erik Medhus si kontrakt med ØIF Arendal går ut etter denne sesongen.

Foto: Morten Rosenvinge / NRK

Kontrakta med ØIF Arendal går ut etter denne sesongen. Det har skapt spekulasjonar kring framtida hans den siste tida.

– På toppnivå i Norge er det kun ØIF Arendal som er eit alternativ, seier Medhus til NRK.

– Kva om du får tilbod frå ein utanlandsk klubb?

– Det kan vere, men den tanken blir fjernare og fjernare for kvart år, seier han.

Fokus på Stord-kampen

Onsdag kan ØIF Arendal sikre seriegullet dersom dei slår Stord på heimebane, og dersom Bodø avgjer poeng borte mot Haslum.

Medhus stadfestar at han er i dialog med klubben om framtida si. Men førebels har han ikkje gitt klubben eit svar på om han kjem til å forlenge kontrakta.

– Eg skal komme med ei tilbakemelding. Det trur eg ikkje kjem før vi er ferdige med Stord-kampen. No er det hundre prosent fokus på Stord-kampen. Alt anna kjem i andre rekke, seier han.

Håpar på ny kontrakt

Medhus har vore ØIF sin beste spelar denne sesongen. Han var mellom anna sentral då laget vann cupen i desember.

Sportsleg leiar Per Carsten Michelsen håpar at Medhus vil skrive under ei ny kontrakt.

– Han har vore viktig for oss denne sesongen. Vi er veldig glade for at han ikkje vil gå til andre norske klubbar. Vi er i dialog for å få han med også neste sesong, seier Michelsen.