– Det kjem til å bli spesielt. Eg har jo vore Start-supportar heile livet, seier Kenneth Udjus til NRK.no.
Sisteskansen har hatt ein god sesong i Sogndal-buret, sett bort ifrå kampen mot Brann der ein kjempetabbe gav bergensarane sigeren.
Viktig kamp
Søndag er han tilbake i heimbyen Kristiansand. Då er det Sogndal-poeng som gjeld for sørlendingen.
– Eg gler meg til det og håpar at Sørlandet viser seg frå si beste side, seier Udjus.
– Det vert ein spennande kamp. Vi kjem til å liggje litt bakpå og eg er litt spent på kva Start vil gjere, om dei kjem til å fly ut frå start eller om dei vil vere litt avventande. Det er ein viktig kamp for begge lag, så det vil nok prege oppgjeret, seier Sogndal-keeperen.
- LES: Nytt Sogndal-tap
- LES: Sjette strake bortetap
Så langt har det blitt ni kampar i eliteserien for Sogndal. Sogningane ligg heilt sist på tabellen før kampen mot Start. Kristiansandsklubben ligg på plassen over berre to poeng føre.
– Det er viktig for oss å vinne og henge med inn mot haustsesongen. Det kan bli eit stykke opp dersom vi skulle tape. Vi må ikkje vinne, men det er viktig å vinne, ler Udjus.
Slo Start som Brann-keeper
Sjølv har han vore med på å vinne på Sør Arena. I 2009 slo nemleg Brann Start 1-0 i Kristiansand, med Kenneth Udjus i mål.
– Det var kjempekjekt. Då eg var i Start var dei i god form og låg høgt på tabellen. I Brann sleit vi nok litt meir og låg lenger ned på tabellen. Vi visste det kom til å bli ein kjempetøff bortekamp, og var vel kanskje litt heldige som vann den kampen, seier han.
– Eg voks opp på Gimlekollen med Jesper Mathisen ikkje så langt unna. Christer Kleiven var i Vigør då eg spelte der, og Ole Martin Årst var jo i Tromsø når eg var der, seier Udjus.
Det er ikkje berre Udjus som har eit fortid i Start. Også spissen Espen Olsen spelte i Start då han var på utlån frå Stabæk. Noverande Start-keeper Kenneth Høie spelte i Sogndal i eliteserien i 2004. Høie var på lån frå Bryne. Også Ole Martin Årst hadde ein kort periode i Sogndal, då han var utleigd frå Tromsø i 1995.
Trur på jamn kamp
Kenneth Udjus spelte sjølv i Start som utespelar til og med junior. Derifrå gjekk han til Vigør der han byrja som keeper.
– Eg heiar på Start når eg ikkje er involvert sjølv. Dei kjempar i botnen no, men eg trur ikkje dei vil liggje der nede når vi kjem utover sesongen, seier han.
– Dei har eit veldig godt lag som er litt utanfor flytsona no, men det er mange gode fotballspelarar der, så dei vil heve seg utover hausten. Det er eg heilt sikker på, seier keeperen.
– Kva trur du resultatet blir?
– Eg trur det blir ein så kjip kamp som 0-1, seier Udjus.
Førre gang Sogndal og Start møttest i Kristiansand vart resultatet 1-1. Då var laga i 1. divisjon. Førre gang laga møttest i eliteserien var i 2001. Då vann Sogndal 3-0 etter scoringar av Håvard Flo (2) og Rune Bolseth.
* Tala er henta frå nifs.no.